جان سینا کب آخری مقابلے کیلئے رنگ میں اتریں گے ، اعلان ہو گیا

48 سالہ سینا نے رواں سال اعلان کیا تھا کہ 2025ء ان کے کیریئر کا آخری سال ہوگا

ذیشان مہتاب جمعہ 3 اکتوبر 2025 12:39

جان سینا کب آخری مقابلے کیلئے رنگ میں اتریں گے ، اعلان ہو گیا

نیویارک (اردو پوائنٹ تازہ ترین اخبار ۔ 3 اکتوبر 2025ء ) ورلڈ ریسلنگ انٹرٹینمنٹ نے لیجنڈری ریسلر جان سینا کے آخری مرتبہ رِنگ میں اترنے کی تاریخ کا باضابطہ اعلان کردیا۔

16 بار کے ورلڈ چیمپئن اور ریکارڈ 17 مرتبہ عالمی اعزاز جیتنے والے جان سینا اپنا الوداعی میچ 13 دسمبر 2025ء کو واشنگٹن ڈی سی کے کیپیٹل ون ارینا میں کھیلیں گے۔

48 سالہ سینا نے رواں سال اعلان کیا تھا کہ 2025ء ان کے کیریئر کا آخری سال ہوگا۔

(جاری ہے)

وہ دنیا بھر میں فیئر ویل ٹور پر ہیں جہاں انہوں نے ریسل مینیا 41 میں تاریخی طور پر اپنا 17واں ورلڈ ٹائٹل جیت کر نیا ریکارڈ قائم کیا اور خود کو ڈبلیو ڈبلیو ای کی تاریخ کا سب سے بڑا اسٹار ثابت کیا۔

جان سینا کے کیریئر میں پانچ یو ایس چیمپئن شپ، دو رائل رمبل فتوحات اور بے شمار یادگار رائیولریز شامل ہیں جنہوں نے جدید ریسلنگ کو نئی پہچان دی۔

سینا نے سوشل میڈیا پر اپنے آخری مقابلے کا عندیہ دیتے ہوئے لکھا کہ ون لاسٹ ڈانس، فائنل فائنل 13/12/25۔

ابھی تک ان کے حریف کا اعلان نہیں کیا گیا، تاہم یہ میچ ڈبلیو ڈبلیو ای کی تاریخ کے سب سے جذباتی اور یادگار مقابلوں میں شمار ہوگا۔