بلوچستان میں مقامی قبائل کی فتنۃ الہندوستان کے دہشتگردوں سے جھڑپ، 4 دہشتگرد ہلاک

دہشتگردوں نے مقامی قبائل کے اصرار کے باوجود علاقے کو خالی کرنے سے انکار کردیا تھا؛ سکیورٹی ذرائع

ساجد علی اتوار 5 اکتوبر 2025 12:29

بلوچستان میں مقامی قبائل کی فتنۃ الہندوستان کے دہشتگردوں سے جھڑپ، ..

کوئٹہ ( اُردو پوائنٹ اخبارتازہ ترین۔ 05 اکتوبر2025ء ) صوبہ بلوچستان میں فتنۃ الہندوستان کے دہشت گردوں پر مقامی قبائل کے حملے میں 4 دہشت گرد مارے گئے۔ سکیورٹی ذرائع کے مطابق صوبہ بلوچستان کے علاقہ کورکی میں مقامی قبائل اور فتنۃ الہندوستان سے تعلق رکھنے والے دہشت گردوں کے درمیان جھڑپ میں 4 دہشت گرد ہلاک اور 2 زخمی ہوئے، ان دہشت گردوں نے مقامی قبائل کے اصرار کے باوجود علاقے کو خالی کرنے سے انکار کردیا تھا۔

اس حوالے سے ذرائع نے مزید بتایا کہ کلی آدم زئی کورکی کی خواتین نے قرآن پاک کا واسطہ دے کر دہشت گردوں کو علاقے سے جانے کی اپیل کی مگر دہشت گردوں نے ناصرف علاقہ خالی کرنے سے انکار کیا بلکہ مقامی خواتین کو مسلسل ہراساں بھی کرتے رہے، اس اشتعال انگیزی کے بعد قبائل نے اپنے دفاع کے لیے ہتھیار اٹھانے کا فیصلہ کیا اور دہشت گردوں سے جھڑپ کے دوران مقامی قبیلے کا ایک فرد شہید اور دو زخمی ہوئے۔

(جاری ہے)

سکیورٹی ذرائع کا کہنا ہے کہ بلوچستان کے بہادر عوام پر فتنۃ الہندوستان کا اصل چہرہ اب واضح ہو چکا، خواتین کو ہراساں کرنے اور مقامی روایات پامال کرنے سے یہ بات ثابت ہو گئی کہ اس فتنے کا نہ اسلام سے کوئی تعلق ہے اور نہ ہی یہ بلوچ اقدار سے تعلق رکھتے ہیں، مقامی قبائل نے عزم کا اظہار کیا کہ اپنے علاقے کو کسی صورت دہشت گردانہ سرگرمیوں کے لیے استعمال نہیں ہونے دیں گے۔