زلزلے کی تباہ کاریوں اور اس کے نتیجے میں شہید ہونے والوں کو ہم آج تک نہیں بھولے ،راجہ محمد خالد

منگل 7 اکتوبر 2025 14:10

برسلز(اُردو پوائنٹ اخبارتازہ ترین - این این آئی۔ 07 اکتوبر2025ء) چیئرمین یوتھ ونگ یورپ وصدر استحکام فورم بیلجیئم راجہ محمد خالد نے 8 اکتوبر 2005 شہدائے زلزلہ کی 20 ویں برسی کے موقع پر اپنے پیغام میں کہا ہے کہ 8 اکتوبر 2005 کا زلزلہ قوم کے لئے آزمائش تھی اور قوم نے اس آزمائش کے وقت میں جس اتحاد اور یکجہتی کا مظاہرہ کیا اس کی مثال نہیں ملتی۔اس زلزلے کی تباہ کاریوں اور اس کے نتیجے میں شہید ہونے والوں کو ہم آج تک نہیں بھولے پوری قوم 8 اکتوبر کی قدرتی آفت کے دوران اپنے پیاروں سے بچھڑ جانے والوں کے غم میں برابر کے شریک ہیں۔

انھوں نے مزید کہا کہ بے مثال قومی اتحاد اور یکجہتی نے متاثرین کو دوبارہ سے اپنے پاؤں پر کھڑا ہونے کے لیے ایک نیا حوصلہ اور عزم دیا۔انہوں نے کہا کہ اس قدرتی آفت کے دوران آزاد جموں وکشمیر اور شمالی علاقوں کے 80 ہزار سے زیادہ افراد شہید اور لاکھوں افراد بے گھر ہوئے تھے آج بھی قوم کو 8 اکتوبر کے زلزلے کے بعد والے اتحاد و یکجہتی کی ضرورت ہے۔

(جاری ہے)

انہوں نے کہا کہ پوری قوم نے جس طرح زلزلے جیسی بڑی آفت کا جانفشانی سے مقابلہ کیا، اسی طرح آپس کے اختلافات کو بھلا کر ملک کو درپیش چیلنجز سے بھی چھٹکارا پایا جا سکتا ہے۔انھوں نے اللّہ تعالیٰ سے 8 اکتوبر 2005 کے زلزلے میں شہید ہونے والوں کے درجات کی بلندی اور وطن عزیز کو ایسی آفات سے محفوظ رکھنے کی خصوصی دعا بھی کی۔

متعلقہ عنوان :