یورپی یونین کا ہتھیاروں پر 2500 ارب یورو خرچ کرنے کا منصوبہ

جمعرات 9 اکتوبر 2025 08:40

برسلز (اُردو پوائنٹ اخبارتازہ ترین - اے پی پی۔ 09 اکتوبر2025ء) یورپی یونین کے دفاع اور خلائی امور کے کمشنر اندریوس کوبیلیوس نے اعلان کیا ہے کہ یورپی یونین 2030 تک ہتھیاروں کی تیاری پر 2500 ارب یورو خرچ کرنے کی توقع رکھتی ہے، جس میں ڈرون طیارے اور ان کے خلاف حفاظتی اقدامات بھی شامل ہوں گے۔ العربیہ کے مطابق کوبیلیوس نے اس بات کا اظہار فرانس کے شہر اسٹراس برگ میں یورپی پارلیمان کے ایک اجلاس کے دوران کیا۔

(جاری ہے)

اجلاس میں یورپی ممالک کے اوپر نا معلوم ڈرونز کی پروازوں کے واقعات پر بحث ہو رہی تھی۔ انھوں نے کہا "2030 تک ہمارے پاس مختلف دفاعی ضروریات کے لیے 2500 ارب یورو خرچ کرنے کی صلاحیت ہوگی۔کوبیلیوس نے امید ظاہر کی کہ اس رقم میں روسی مرکزی بینک کے منجمد اثاثوں کا کچھ حصہ بھی شامل ہو سکے گا۔تاہم یورپی یونین کے رکن ممالک یکم اکتوبر کو کوپن ہیگن میں ہونے والی سربراہی ملاقات میں یورپی کمیشن کی جانب سے روسی اثاثے ضبط کرنے کی تجویز پر متفق نہیں ہو سکے۔