راولپنڈی اسلام آباد میں مذہبی جماعت کا احتجاج ، سیکیورٹی ہائی الرٹ، راستے اورموبائل انٹرنیٹ سروس بند

جمعہ 10 اکتوبر 2025 22:31

اسلام آباد /اسلام آباد (اُردو پوائنٹ اخبارتازہ ترین - این این آئی۔ 10 اکتوبر2025ء) وفاقی دارالحکومت اسلام آباد اورراولپنڈی میں مذہبی جماعت کے ممکنہ احتجاج کے باعث سیکیورٹی ہائی الرٹ کردی گئی ، ، وزارت داخلہ نے موبائل انٹرنیٹ سروس تاحکمِ ثانی بند کرنے کے احکامات جاری کردیے جس کے باعث شہریوں کو اپنے عزیز و اقارت سے رابطے میں پریشانی کا سامنا رہا ۔

تفصیلات کے مطابق مری روڈ کی طرف آنے والی تمام رابطہ سڑکیں بند کر دی گئیں جبکہ فیض آباد سے صدر تک جگہ جگہ رکاوٹیں کھڑی کر دی گئیں، فیض آباد، سکستھ روڈ، چاندنی چوک اور لیاقت باغ کے اطراف پولیس کی بھاری نفری تعینات رہی، مختلف علاقوں میں راستوں کی بندش سے شہریوں کو شدید مشکلات کا سامنا رہا۔انتظامیہ نے جڑواں شہروں میں میٹرو بس سروس معطل کر دی ہے جبکہ پبلک ٹرانسپورٹ بھی نہ ہونے کے برابر ہے جس سے دفاتر جانے والے افراد اور مریضوں کو اسپتال پہنچنے میں شدید مشکلات درپیش ہیں۔

(جاری ہے)

مری روڈ کے اطراف کاروباری مراکز اور ہوٹل بند رکھنے کے احکامات جاری کیے گئے ہیں ،تمام تعلیمی ادارے بھی بند رہیں گے۔اسلام آباد اور راولپنڈی کو ملانے والے تمام داخلی و خارجی راستے مکمل طور پر سیل کر دیے گئے ہیں، پولیس حکام کے مطابق شہر میں دفعہ 144 نافذ ہے اور کسی قسم کے احتجاج یا اجتماع کی اجازت نہیں دی جائیگی، قانون کی خلاف ورزی پر فوری کارروائی کی جائے گی۔

دوسری جانب وزارت داخلہ نے راولپنڈی اور اسلام آباد میں موبائل انٹرنیٹ سروس تاحکمِ ثانی بند کرنے کا فیصلہ کیا ہے، پی ٹی اے کو باضابطہ خط ارسال کیا گیا ہے جس میں ہدایت کی گئی کہ اسلام آباد اور راولپنڈی میں 3G اور 4G سروسز جمعرات اور جمعہ کی درمیانی شب 12 بجے سے اگلے احکامات تک معطل رہیں گی۔خط میں کہا گیا کہ موبائل انٹرنیٹ معطلی کے انتظامات مکمل کیے جائیں، اسلام آباد کے کمشنر، آئی جی اور آر پی او راولپنڈی کو بھی اس حوالے سے آگاہ کر دیا گیا ہے۔وزارت داخلہ کے مطابق انٹرنیٹ سروس کی بندش سیکیورٹی خدشات کے پیش نظر کی گئی ہے۔