سیلاب متاثرین کی مکمل بحالی تک چین سے نہیں بیٹھیں گے، وسیم حامد سندھو

ہفتہ 11 اکتوبر 2025 18:30

ملتان (اُردو پوائنٹ اخبارتازہ ترین - اے پی پی۔ 11 اکتوبر2025ء) جلالپور پیر والہ میں سیلاب متاثرین کی بحالی کے لئے ضلعی انتظامیہ کی جانب سے آپریشن تاحال جاری ہے۔ اس سلسلے میں ڈپٹی کمشنر وسیم حامد سندھو نے موٹر وے جلالپور سیکشن کا دورہ کیا اور مرمتی کام کا جائزہ لیا۔ اس موقع پر متعلقہ محکموں کے افسران نے انہیں جاری کاموں کے حوالے سے بریفنگ دی۔

ڈپٹی کمشنر نے سیلاب سے متاثرہ علاقوں میں قائم خیمہ بستی کا بھی معائنہ کیا اور متاثرہ خاندانوں سے ملاقات کی۔

(جاری ہے)

انہوں نے کہا کہ سیلاب متاثرین کی مکمل بحالی تک چین سے نہیں بیٹھیں گے۔ بحالی کے تمام اقدامات حکومت پنجاب کی ہدایات کے مطابق جاری ہیں اور کسی بھی متاثرہ خاندان کو تنہا نہیں چھوڑا جائے گا۔انہوں نے بتایا کہ سیلاب متاثرین کی بحالی کے سروے کا عمل تیزی سے جاری ہے تاکہ نقصانات کا درست تخمینہ لگا کر ہر مستحق خاندان کو بروقت مدد فراہم کی جا سکے۔ ڈپٹی کمشنر نے تمام محکموں کو ہدایت کی کہ وہ متاثرہ عوام کی خدمت کو اپنی اولین ترجیح بنائیں اور بحالی کے عمل میں کسی قسم کی سستی یا کوتاہی برداشت نہیں کی جائے گی۔