چیئرمین سی ڈی اے کی ہدایت پر راول ڈیم کے اطراف بھرپور صفائی مہم کا آغاز

سول سوسائٹی ، سکول، کالج و یونیورسٹی کے طلباء اور شہریوں کو صفائی مہم کا حصہ بننے کیلئی15 اکتوبر صبح سے شام تک حصہ لے سکتے ہیں،محمدعلی راندھاوا

اتوار 12 اکتوبر 2025 18:25

اسلام آباد(اُردو پوائنٹ اخبارتازہ ترین - این این آئی۔ 12 اکتوبر2025ء) چیئرمین سی ڈی اے و چیف کمشنر اسلام آباد محمد علی راندھاوا کی ہدایت پر راول ڈیم کے اطراف بھرپور صفائی مہم کا آغاز کردیا گیا ہے۔ اس سلسلہ میں سی ڈی اے کی سولڈ ویسٹ مینجمنٹ ڈائریکٹریٹ کا راول ڈیم کے اطراف کوڑا کرکٹ نکانے کیلئے صفائی آپریشن تیزی سے جاری ہے۔اس ضمن میں اس مہم کو بھرپور انداز میں موثر بنانے کے لئے چیئرمین سی ڈی اے محمد علی رندھاوا نے کہا کہ سول سوسائٹی طلباء اور شہریوں کو بھی راول ڈیم صفائی مہم میں شامل کرکے اس مہم کو مزید جامع اور وسعت دی جائی،سول سوسائٹی اور سکول، کالج و یونیورسٹی کے طلباء اور شہریوں کو صفائی مہم کا حصہ بننے کیلئی15 اکتوبر صبح سے شام تک حصہ لے سکتے ہیں۔

اس مہم کا حصہ بننے کیلئے ڈائریکٹر سولڈ ویسٹ مینجمنٹ سے براہ راست واٹس ایپ نمبر 3005357667 پر رابطہ کر کے یاسی ڈی اے کی ویب سائٹ https://cda.gov.pk کے زریعے بھی رجسٹریشن کروائی جاسکتی ہے۔

(جاری ہے)

چیئرمین سی ڈی اے نے کہا کہ سول سوسائٹی و طلباء اس صفائی مہم میں شامل ہوکر سی ڈی اے کا ساتھ دیں اور صاف ستھرے ماحول کو یقینی بنائیں۔ انہوں نے کہا کہ یہ مہم گندگی کے خلاف آگاہی و بیداری پیدا کرنے اور عوام میں شہری ذمہ داری کا جذبہ پروان چڑھانے کے مقصد سے شروع کی جائے۔

انہوں نے کہا کہ ان اقدامات کا مقصد آبی حیات اور اسلام آباد کے قدرتی ماحول کو تحفظ فراہم کرنا ہے،گندگی پھیلانے والے عناصر کے خلاف شکایات کا اندراج سی ڈی اے ہلپ لائن 1334 پر بھی کرواسکتے ہیں۔ چیئرمین سی ڈی اے نے کہا کہ یہ اقدام نہ صرف راول ڈیم کے قدرتی حسن کو بحال رکھنے میں معاون ثابت ہوگا بلکہ شہریوں کو صحتمند ماحول فراہم کرنے میں بھی مددگار ثابت ہوگا۔واضح رہے راول ڈیم کے اردگرد گندگی پھیلانے والے عناصر کے خلاف قانون کے مطابق سخت کارروائی کا آغاز کردیا گیا ہے اور متعلقہ شعبہ جات کی جانب سے راول ڈیم کے اطراف واقع ریستورانوں، ہاؤسنگ سوسائٹیز اور کمرشل مراکز کو گندگی پھیلانے پر چالان جاری کرنے کا سلسلہ بھی شروع کردیا گیا ہے۔