کوہستان لوئر میں انسداد پولیو مہم کا آغاز،سخت سکیورٹی انتظامات

پیر 13 اکتوبر 2025 10:30

ایبٹ آباد (اُردو پوائنٹ اخبارتازہ ترین - اے پی پی۔ 13 اکتوبر2025ء) کوہستان لوئر میں انسداد پولیو مہم کا باقاعدہ آغاز سخت سکیورٹی انتظامات کے ساتھ ہو گیا۔ پولیس کے مطابق ضلعی پولیس سربراہ عبدالسلام خالد کی خصوصی ہدایات پر انسداد پولیو مہم کے دوران سکیورٹی کے فول پروف انتظامات عمل میں لائے گئے ہیں۔ تمام ایس ڈی پی اوز، ایس ایچ اوز اور چوکی انچارجز کو ہدایت کی گئی ہے کہ وہ پولیو ٹیموں کے ساتھ تعینات پولیس اہلکاروں کی براہ راست نگرانی کریں اور سکیورٹی ڈیوٹی کو خود مانیٹر کریں۔

(جاری ہے)

انہوں نے کہا کہ تمام پولیس اہلکار ہیلمٹ اور بلٹ پروف جیکٹ کے ساتھ فرائض انجام دے رہے ہیں تاکہ مہم کے دوران ٹیموں کو ہر ممکن تحفظ فراہم کیا جا سکے۔ ضلعی پولیس کی جانب سے داخلی و خارجی راستوں پر ناکہ بندیاں اور سنیپ چیکنگ کا سلسلہ بھی جاری ہے۔ ڈی پی او کوہستان لوئر نے پولیس اہلکاروں کو ہدایت کی ہے کہ وہ دوران ڈیوٹی مکمل چوکنا اور مستعد رہیں۔ انہوں نے والدین سے اپیل کی کہ وہ اپنے بچوں کو پولیو کے قطرے ضرور پلائیں تاکہ آنے والی نسل کو اس موذی مرض سے ہمیشہ کے لئے محفوظ بنایا جا سکے۔ ان کا کہنا تھا کہ شہری کسی بھی مشکوک سرگرمی کی اطلاع فوری طور پر قریبی پولیس سٹیشن کو دیں۔