ممبرسٹینڈنگ کمیٹی برائے محکمہ وائلڈ لائف کا محکمہ کے دفتر کادورہ

جمعرات 16 اکتوبر 2025 21:53

بہاولپور (اُردو پوائنٹ اخبارتازہ ترین - اے پی پی۔ 16 اکتوبر2025ء) ممبر اسٹینڈنگ کمیٹی برائے محکمہ وائلڈ لائف سعدیہ بلال نے محکمہ وائلڈ لائف کے دفتر کا اچانک دورہ کیا۔ ڈپٹی چیف محکمہ وائلڈ لائف سید علی عثمان بخاری نے رکن پنجاب اسمبلی سعدیہ بلال کو ڈویژن بھر میں شکار کی صورتحال اور جاری پابندیوں کے بارے میں تفصیلی بریفنگ دی۔انہوں نے بتایا کہ بہاولپور ڈویژن کے تینوں اضلاع میں فی الوقت کسی بھی قسم کے شکار کی اجازت نہیں ہے۔

ڈپٹی چیف نے بتایا کہ جنگلی حیات کی حفاظت او لین ترجیح ہے اور پابندی کی خلاف ورزی کرنے والوں کے خلاف کوئی نرمی نہیں برتی جائے گی۔ انہوں نے کہا کہ محکمہ کی جانب سے جاری کردہ مراسلہ کے مطابق نگرانی کو تیز کر دیا گیا ہے اور چوکیوں کی تعداد بڑھانے، پیٹرولنگ میں اضافہ اور شکایات پر فوری کارروائی کے نظام کو فعال کیا گیاہے۔

(جاری ہے)

محکمہ وائلڈ لائف نے عوام سے اپیل کی ہے کہ وہ جنگلی حیات کے تحفظ میں اپنا کردار ادا کریں اور شکارکرنے والے کی اطلاع فوراً متعلقہ حکام کو دیں۔

انہوں نے کہا کہ شہری اگر محکمہ وائلڈ لائف کو معلومات فراہم کریں گے تو ان کی شناخت خفیہ رکھی جائے گی۔ علاقہ کے لوگوں کا کہنا تھا کہ بعض عناصر غیرقانونی شکار کے ذریعے ماحولیاتی توازن کو خطرے میں ڈال رہے ہیں، جسے فوری طور پر روکا جانا ضروری ہے۔ محکمہ وائلڈ لائف نے واضع کیا کہ خلاف ورزی کرنے والوں کے خلاف مقدمات بھی درج کرائے جائیں گے۔ ڈپٹی چیف محکمہ وائلڈ لائف نے بتایا کہ بہاولپور ڈویژن میں شکار کا تناسب نمایاں طور پر کم ہوگا اور جنگلی حیات کو محفوظ ماحول فراہم کیا جا سکے گا۔ اس موقع پر مسلم لیگ ن لائرز فورم کے سینئر نائب صدر بلال ملک بھی موجود تھے۔