ریلوے حکام کا بغیر ٹکٹ مسافروں کے خلاف بھرپور کریک ڈاؤن، تین روز میں 46 لاکھ روپے سے زائد جرمانے وصول

اتوار 19 اکتوبر 2025 16:30

ملتان (اُردو پوائنٹ اخبارتازہ ترین - اے پی پی۔ 19 اکتوبر2025ء) وفاقی وزیر برائے ریلوے حنیف عباسی کی خصوصی ہدایات اور ڈویژنل سپرنٹنڈنٹ ریلوے ملتان افتخار حسین کی نگرانی میں بغیر ٹکٹ سفر کرنے والے مسافروں کے خلاف ریلوے حکام کی کارروائیاں جاری ہیں۔ ڈویژنل کمرشل آفیسر (ڈی سی او) پاکستان ریلوے ملتان رملہ شاہد راؤ کی زیرِ نگرانی جاری تین روزہ آپریشن کے دوران مختلف ٹرینوں میں 3 ہزار 569 مسافروں سے مجموعی طور پر 46 لاکھ 44 ہزار 600 روپے کرایہ و جرمانہ کی مد میں وصول کر کے قومی خزانے میں جمع کرا دیے گئے۔

ڈی سی او رملہ شاہد راؤ نے دورانِ کارروائی مختلف ٹرینوں میں مسافروں کی شکایات بھی موقع پر سنیں اور فوری حل کے احکامات جاری کیے۔ انہوں نے مسافروں پر زور دیا کہ بغیر ٹکٹ سفر سے گریز کریں کیونکہ دورانِ سفر بغیر ٹکٹ پائے جانے والے مسافروں سے کرایہ ٹرین کے آغاز سے بمعہ جرمانہ وصول کیا جاتا ہے جبکہ واجبات ادا نہ کرنے والے افراد کو ریلوے پولیس کے حوالے کر دیا جاتا ہے۔

(جاری ہے)

ڈی سی او نے ملتان اور بہاولپور ریلوے اسٹیشنز پر موجود مختلف اسٹالوں کا معائنہ بھی کیا، جہاں کھانے پینے کی اشیاء کے معیار کو چیک کیا گیا۔ ناقص اشیاء فراہم کرنے والے اسٹال مالکان پر بھاری جرمانے عائد کیے گئے۔رملہ شاہد راؤ نے واضح کیا کہ ریلوے انتظامیہ مسافروں کی سہولت، خدمات کے معیار اور نظم و ضبط کے معاملے میں کسی قسم کی رعایت نہیں برتے گی۔