متحدہ عرب امارات میں پہلا روزہ 19 فروری 2026 کو ہونے کا امکان

جمعہ 17 اکتوبر 2025 13:29

ابو ظہبی (اُردو پوائنٹ اخبارتازہ ترین - اے پی پی۔ 17 اکتوبر2025ء) متحدہ عرب امارات(یواے ای) میں نئے ہجری سال 1447ھ میں پہلا روزہ 19 فروری 2026 کو ہونے کا امکان ہے۔

(جاری ہے)

العربیہ اردو کے مطابق یواے ای کی فلکیاتی انجمن کےصدر ابراہیم جروان نے بتایا کہ رمضان 1447ھ کا چاند 17 فروری کو شام 4 بج کر ایک منٹ پر (امارات کے وقت کے مطابق)پیدا ہوگا جو سعودی عرب کے وقت کے مطابق 3 بجکر ایک منٹ بنتا ہے، سورج غروب ہونے کے تقریباً ایک منٹ بعد ہی چاند غائب ہو جائے گا، اس طرح غروبِ آفتاب کے وقت اس کی عمر صرف 2 گھنٹے 12 منٹ ہوگی لہٰذا اس شام رمضان المبارک کا چاند نظر آنے کا امکان بہت کم ہے۔

انہوں نے بتایا کہ اسی بنیاد پر 19 فروری کو پہلاروزہ ہونے جبکہ عیدالفطر یعنی شوال 1447ھ کا آغاز 20 مارچ 2026 کو ہونے کا امکان ہے۔رمضان المبارک کے آغاز کی حتمی تاریخ کا اعلان 18 فروری 2026 (29 شعبان 1447ھ) کی شام چاند دیکھنے کے بعد ہونے کی توقع ہے ۔