Live Updates

سرفرازبگٹی سے قمرزمان کائرہ کی ملاقات ، باہمی دلچسپی کے اموراورصوبے کی مجموعی صورتحال پرتفصیلی تبادلہ خیال

جمعہ 17 اکتوبر 2025 21:22

اسلام آباد (اُردو پوائنٹ اخبارتازہ ترین - این این آئی۔ 17 اکتوبر2025ء) وزیر اعلیٰ بلوچستان میر سرفراز بگٹی سے پاکستان پیپلزپارٹی کے مرکزی رہنماء و سابق وفاقی وزیر قمر زمان کائرہ نے ملاقات کی جس میں باہمی دلچسپی کے امور اور صوبے کی مجموعی صورتحال پر تفصیلی تبادلہ خیال کیا گیا ۔ ملاقات میں گفتگو کرتے ہوئے وزیر اعلیٰ بلوچستان میر سرفراز بگٹی نے کہاکہ پیپلزپارٹی اپنی اتحادی جماعتوں کے ساتھ فلاحِ عامہ کے کاموں میں سرگرم عمل ہے، بلوچستان کے نوجوانوں اور ریاست کے درمیان فاصلے کم کرنا چاہتے ہیں۔

وزیر اعلیٰ بلوچستان نے کہاکہ میرٹوکریسی کو فروغ دیکر گڈ گورننس کی تشکیل کے لئے سنجیدہ اقدامات کررہے ہیں، بینظیر بھٹو اسکالرشپ پروگرام صوبے کی تاریخ کا سب سے بڑا تعلیمی پروگرام ہے۔

(جاری ہے)

میرسرفراز بگٹی نے کہاکہ پرائمری سے اعلیٰ تعلیم تک طلباء کو اسکالرشپ فراہم کی جائے گی۔وزیراعلیٰ بلوچستان نے کہاکہ بلوچستان کے طلباء کے لیے دنیا کی 200 معیاری جامعات کے دروازے کھول دیئے گئے ہیں، سویلین شہداء ، اقلیتوں اور ٹرانس جینڈرز کے لیے بھی خصوصی اسکالرشپ پروگرام شروع کیا گیا ہے۔

وزیر اعلیٰ بلوچستان نے کہاکہ نوجوانوں سے ڈائیلاگ کے ذریعے ان کے مسائل کے حل کے لیے عملی اقدامات کر رہے ہیں، بلا سود قرضہ پروگرام ایک انقلابی قدم ہے، اس پر جلد عمل درآمد ہوگا۔ انہوںنے کہاکہ چیف منسٹر یوتھ اسکلز ڈویلپمنٹ باعزت روزگار پروگرام نوجوانوں کے لیے روشن مستقبل کا ذریعہ ہے۔ قمرزمان کائرہ نے کہاکہ بلوچستان کی ترقی میں پیپلزپارٹی اپنا بھرپور کردار ادا کرتی رہے گی، پیپلزپارٹی وفاق کی علامت ہے، ہم قومی ہم آہنگی اور عوامی خدمت پر یقین رکھتے ہیں۔قمر زمان کائرہ نے کہاکہ وزیر اعلیٰ بلوچستان میر سرفراز بگٹی کے ترقیاتی وژن کی مکمل حمایت کرتے ہیں۔