ڈریپ کو میڈیکل ڈیوائسز ڈیلرز ایسوسی ایشن کیخلاف کارروائی سے روک دیا گیا

جمعہ 17 اکتوبر 2025 20:35

اسلام آباد (اُردو پوائنٹ اخبارتازہ ترین - این این آئی۔ 17 اکتوبر2025ء) اسلام آباد ہائیکورٹ نے ڈریپ کو میڈیکل ڈیوائسز ڈیلرز ایسوسی ایشن کے خلاف تادیبی کارروائی سے آئندہ سماعت تک روک دیا۔جمعہ کوجسٹس خادم حسین سومرو نے پاکستان میڈیکل ڈیوائسز ڈیلرز ایسوسی ایشن کی درخواست پر سماعت کا تحریری حکم نامہ جاری کیا، وزارت صحت اور ڈریپ سمیت تمام فریقین کو نوٹس جاری کرکے دو ہفتوں میں جواب طلب کرلیا جبکہ اٹارنی جنرل کو بھی عدالت کی معاونت کے لیے نوٹس جاری کر دیا گیا۔

جسٹس خادم حسین سومرو نے کے جاری کردہ حکم نامہ میں کہا گیا ہے کہ درخواست گزار کے مطابق آئی وی ڈی ڈیوائسز علاج نہیں، صرف تشخیص میں مدد دیتی ہیں، ڈریپ نے ان میڈیکل ڈیوائسز کو بھی اپنے دائرہ اختیار میں شامل کر لیا جس کی اسے صرف نگرانی کی اجازت ہے۔

(جاری ہے)

درخواست گزار وکیل کے مطابق ڈریپ نے تشخیصی سامان یا آئی وی ڈی میڈیکل ڈیوائسز کو بھی رجسٹریشن سے مشروط کردیا، ڈریپ کا ایس آر او خلاف قانون ہے، ڈریپ کے ایس آر او کی وجہ سیامپورٹرز اور ہیلتھ انڈسٹری کو مشکلات کا سامناہے۔

درخواست گزار وکیل کے مطابق ایس آر او کی وجہ سے ملک بھرمیں میڈیکل ڈیوائسز کی قلت ہو رہی ہے۔حکم نامہ میں عدالت نے کہا کہ ڈریپ اور دیگر ادارے آئندہ سماعت تک درخواست گزاروں کے خلاف تادیبی کاروائی نہ کریں ،کیس کی مزید سماعت نومبر کے دوسرے ہفتہ میں کی جائے گی۔