تھانہ کوٹ مبارک پولیس کی بڑی کارروائی، تھانہ کوٹ مبارک پولیس نے لادی گینگ کے قبضے سے اغوا ہونے والا بچہ بحفاظت بازیاب کرالیا

اتوار 19 اکتوبر 2025 00:10

ڈیرہ غازی خان (اُردو پوائنٹ اخبارتازہ ترین - اے پی پی۔ 19 اکتوبر2025ء) تھانہ کوٹ مبارک پولیس نے بروقت اور جرات مندانہ کارروائی کرتے ہوئے لادی گینگ کے قبضے سے اغوا ہونے والا کم عمر بچہ محمد صدیق بحفاظت بازیاب کرالیا۔پولیس کے مطابق بچہ چند روز قبل موضع عمرانی سے اغوا کیا گیا تھا، جسے لادی گینگ کے کارندے اندرونِ پہاڑ علاقے میں لے گئے تھے۔

(جاری ہے)

واقعہ کی اطلاع ملتے ہی تھانہ کوٹ مبارک پولیس نے فوری طور پر مقدمہ درج کیا اور خفیہ اطلاع کی بنیاد پر مؤثر حکمتِ عملی کے تحت کارروائی کرتے ہوئے مخصوص مقام پر ریڈ کیا۔

کارروائی کے دوران ملزمان اندھیرے کا فائدہ اٹھاتے ہوئے فرار ہونے میں کامیاب ہوگئے تاہم پولیس ٹیم نے مغوی بچے کو بحفاظت بازیاب کرلیا۔ فرار ملزمان کی گرفتاری کے لیے سرچ آپریشن جاری ہے۔ڈی پی او ڈیرہ غازی خان کیپٹن (ر) طارق ولایت نے کارروائی پر پولیس ٹیم کو شاباش دیتے ہوئے کہا کہ لادی گینگ جیسے جرائم پیشہ عناصر کے خلاف بلا خوف و خطر کارروائیاں جاری رہیں گی۔ عوام کی جان و مال کا تحفظ ڈیرہ غازی خان پولیس کی اولین ترجیح ہے، قانون شکن عناصر کو کسی صورت برداشت نہیں کیا جائے گا۔