پرتگال میں عوامی مقامات پر برقع اور نقاب پر پابندی کا بل منظور

اتوار 19 اکتوبر 2025 14:40

لزبن (اُردو پوائنٹ اخبارتازہ ترین - اے پی پی۔ 19 اکتوبر2025ء) پرتگال کی پارلیمنٹ نےایک بل کی منظوری دی ہے جس کے تحت عوامی مقامات پر مذہبی یا صنفی وجوہات کی بنا پر چہرہ ڈھانپنے پر پابندی عائد کر دی گئی ہے۔ امریکی خبر رساں ادارے ایسوسی ایٹڈ پریس کے مطابق اس اقدام کو کچھ مسلمان خواتین کے چہرے کے نقاب کو نشانہ بنانے کے طور پر دیکھا گیا ہے۔

(جاری ہے)

یہ بل دائیں بازو کی انتہا پسند جماعت ’چیگا‘ نے پیش کیا تھا، جس کے تحت برقع، جو پورے جسم کو ڈھانپتا ہے اور نقاب جو صرف آنکھوں کے گرد جگہ چھوڑتا ہے، کے عوامی مقامات پر پہننے پر پابندی ہوگی۔

تاہم عبادت گاہوں، سفارتی دفاتر اور ہوائی جہازوں میں ان کی اجازت برقرار رہے گی۔بل کے تحت چہرہ ڈھانپنے والی خواتین پر 200 یورو سے لے کر 4000 یورو تک جرمانہ عائد کیا جا سکتا ہے۔بل کو قانون بننے کے لیے ابھی صدر مارسيلو ریبیلو دی سوسا کی منظوری درکار ہے، جو اسے ویٹو کر سکتے ہیں یا آئینی عدالت کو بھیج سکتے ہیں۔اگر یہ بل قانون بن گیا تو پرتگال بھی اُن یورپی ممالک کی فہرست میں شامل ہو جائے گا جہاں چہرے یا سر ڈھانپنے پر مکمل یا جزوی پابندیاں موجود ہیں، جن میں آسٹریا، بیلجیم اور نیدرلینڈزشامل ہیں۔