دسویں دو روزی مفت ادب فیسٹیول 22 نومبر سے بہت سٹی شارع فیصل میں شروع ہوگا،امینہ سید

کراچی (اُردو پوائنٹ اخبارتازہ ترین - این این آئی۔ 10 نومبر2025ء) ادب فیسٹیول کی بانی و ڈائریکٹر اور لائٹ اسٹون پبلشرز کی منیجنگ ڈائریکٹر امینہ سید (S.I.) نے آج ایک پریس کانفرنس میں دسویں ادب فیسٹیول کے مقررین اور متوقع پروگرام کی تفصیلات کا اعلان کیا جس کے مطابق یہ تاریخی فیسٹیول کراچی میں ہفتہ، 22 نومبر اور اتوار، 23 نومبر 2025 کو ہبٹ سٹی، شارع فیصل/ٹیپو سلطان روڈ پر منعقد ہوگا۔

پروگرام ہفتے کے روز دوپہر ایک بجے سے رات 9:30 بجے تک اور اتوار کو دوپہر 12 بجے سے رات 9:30 بجے تک جاری رہے گا۔امینہ سید نے فیسٹیول کی جھلکیاں بیان کرتے ہوئے متعدد ممتاز مقررین کا تعارف کرایا اور کہا: گذشتہ برسوں کی طرح اس مرتبہ بھی ادب فیسٹیول کا باریک بینی سے ترتیب دیا گیا پروگرام متنوع اور صاحبِ فکر شخصیات پر مشتمل ہے، جن میں زہرہ نگاہ، فرحت اللہ بابر، زاہد حسین، کشور ناہید، شندانہ منہاس، وسعت اللہ خان، ضرار کھوڑو، ڈاکٹر عشرت حسین، میاں رضا ربانی، شہزاد غیاث، یاسمین لاری، مونس عبداللہ، ڈاکٹر فیصل مشتاق، سلطانہ صدیقی، مہتاب راشدی، شرمیلا فاروقی، شازیہ مری، جنرل معین الدین حیدر، ڈاکٹر محمد علی شیخ، اعزاز سید، ندیم فاروق پراچہ، شبر زیدی، سید سلیم رضا، نورالہدی شاہ، سیف سمیجو، سعید مہدی، ثروت محی الدین، سلمی عالم، ارشد محمود، عمیر عزیز سید، ثمیرہ نقوی، نادیہ نقی، فاضل جمیلی، اظہر عباس، نائلہ محمود، عمر شاہد حمید، صفینہ دانش الہی، طہ کہار، مظہر عباس، انجم ہلائی، محمد علی شہکی، نورالہدی شاہ، سلمان فاروقی اور ڈاکٹر ہما بقائی شامل ہیں۔

(جاری ہے)

یہ تمام دانشور اہم موضوعات پر مکالموں میں حصہ لیں گے، مروجہ بیانیوں کو پرکھیں گے اور متبادل نقطہ نظر سامنے لائیں گے۔انہوں نے مزید کہا: اس موقع پر اردو، انگریزی اور سندھی زبانوں میں نمایاں ادبی خدمات کے اعتراف میں ادب فیسٹیول/انفاق فانڈیشن ایوارڈز کا اعلان بھی کیا جائے گا۔قابلِ ذکر تصانیف میں Beyond the Bomb از منیر احمد خان، Pakistans Nuclear Odyssey از فرحت اللہ بابر، The Eyewitness: Standing in the Shadows of Pakistan's History از سعید مہدی، Queen Zarqa, A Transgenders Odyssey از حیات روغانی (ترجمہ: شمع عسکری)، اور The Future of Civilization از سید احمد تقی شامل ہیں۔

یہ تمام کتب فیسٹیول میں زیرِ بحث بھی آئیں گی۔امینہ سید نے ادب فیسٹیول کے تمام معاون اداروں کا شکریہ ادا کیا، جن میں لائٹ اسٹون پبلشرز، حکومتِ سندھ، ڈان، برٹش کونسل، انسٹی ٹیوٹ آف بزنس مینجمنٹ، حبیب میٹروپولیٹن بینک، ملیحہ و منیر بھیم جی، بینک آف پنجاب، فیصل بینک، پارکو، او جی ڈی سی، ٹی سی ایس اور ہبٹ کراچی شامل ہیں-انہوں نے ادب فیسٹیول کی ٹیم، خصوصا لائٹ اسٹون پبلشرز کے عملے کی انتھک محنت کو بھی سراہا جن کی بدولت یہ فیسٹیول ممکن ہوسکا۔

ادب فیسٹیول ایک نئی سلک روٹ کے طور پر کام کرتا ہے جو ثقافتی اور فکری فاصلے مٹاتے ہوئے ادب، فن اور تخلیقی خیالات کے تبادلے کو فروغ دیتا ہے۔یہ مفت اور عوامی فیسٹیول کتاب، ادب، موسیقی اور فنونِ لطیفہ سے محبت کے جذبات کو اجاگر کرتا ہے اور معاشرتی ہم آہنگی اور شمولیت کو مضبوط بناتا ہے۔ادب فیسٹیول کا مقصد تخلیقی اظہار، فکری مکالمے اور بصیرت افروز مباحث کے ذریعے ایک ایسا پلیٹ فارم فراہم کرنا ہے جو معاشرے کی فکری روح کا ترجمان بن سکے۔