گورنر خیبرپختونخوا فیصل کریم کنڈی سےپاکستان ویل چیئر کرکٹ کونسل کے وفد کی ملاقات

پیر 27 جولائی 2026 20:38

اسلام آباد (اُردو پوائنٹ اخبارتازہ ترین - اے پی پی۔ 27 جولائی2026ء) گورنر خیبرپختونخوا فیصل کریم کنڈی سےپاکستان ویل چیئر کرکٹ کونسل کی چیئرپرسن رخسانہ راجپوت کی قیادت میں وفد نے ملاقات کی۔ وفد میں دو مرتبہ ایشین چیمپئن پاکستان ویل چیئر کرکٹ ٹیم کے کپتان محمد ذیشان بھی شامل تھے۔پیر کو گورنر آفس سے جاری بیان کے مطابق ملاقات میں پاکستان میں ویل چیئر کرکٹ کے فروغ، بین الاقوامی کھیلوں کے انعقاد اور آئندہ تیسرے ٹی-20 ویل چیئر کرکٹ ایشیا کپ 2026 کی تیاریوں پر تفصیلی تبادلہ خیال کیا گیا۔

وفد نے گورنرخیبرپختونخوا کو بتایا کہ ایشیا کپ 29 ستمبر سے 8 اکتوبر 2026 تک کراچی اور حیدرآباد میں منعقد ہوگاجس میں جنوبی ایشیا کی مختلف ٹیمیں شرکت کریں گی۔اس موقع پر گورنرخیبرپختونخوا فیصل کریم کنڈی نے پاکستان ویل چیئر کرکٹ ٹیم کی شاندار کامیابیوں اور دو مرتبہ ایشین چیمپئن بننے پر کھلاڑیوں اور انتظامیہ کو مبارکباد دی۔

(جاری ہے)

انہوں نے کہا کہ خصوصی افراد نے اپنی صلاحیتوں، محنت اور عزم سے پاکستان کا نام بین الاقوامی سطح پر روشن کیا ہےجو پوری قوم کے لئے باعث فخر ہے۔

وفد نے گورنر خیبرپختونخوا کو بتایا کہ ویل چیئر کرکٹ کے سرپرست کی حیثیت سے گورنر فیصل کریم کنڈی نے ہمیشہ اس کھیل کے فروغ میں صفِ اول کا کردار ادا کیا ہے۔وفد نے درخواست کی کہ گورنر خیبرپختونخوا ، وزیراعلیٰ سندھ کو ایک خصوصی خط ارسال کریں تاکہ سندھ حکومت کراچی اور حیدرآباد میں ایشیا کپ 2026 کے کامیاب انعقاد کے لئے بھرپور انتظامی تعاون اور سہولیات فراہم کرے۔گورنر فیصل کریم کنڈی نے وفد کو یقین دلایا کہ وہ خصوصی افراد کے کھیلوں کے فروغ کے لئے اپنی بھرپور حمایت جاری رکھیں گے اورقومی مفاد، پاکستان کے وقار اور ویل چیئر کرکٹ کی ترقی کے لئے ہر ممکن تعاون کریں گے۔ انہوں نے کہا کہ خصوصی کھلاڑی ہمارے قومی ہیرو ہیں اور ان کی حوصلہ افزائی ہم سب کی مشترکہ ذمہ داری ہے۔