الیکشن کمیشن آف پاکستان نے این اے 18 ہری پور میں مبینہ انتخابی بے ضابطگیوں سے متعلق درخواستوں پر فیصلہ محفوظ کر لیا

بدھ 24 دسمبر 2025 23:22

اسلام آباد (اُردو پوائنٹ اخبارتازہ ترین - آن لائن۔ 24 دسمبر2025ء) الیکشن کمیشن آف پاکستان نے این اے 18 ہری پور میں مبینہ انتخابی بے ضابطگیوں سے متعلق درخواستوں پر سماعت کے بعد فیصلہ محفوظ کر لیا ۔ شہر ناز عمر ایوب کی جانب سے دائر کی گئی درخواست کی سماعت چیف الیکشن کمشنر سکندر سلطان راجہ کی سربراہی میں پانچ رکنی بینچ نے کی، جس دوران درخواست گزار کے وکیل اور الیکشن کمیشن حکام نے اپنے مؤقف پیش کیے۔

سماعت کے آغاز پر شہر ناز عمر ایوب کے وکیل نے عدالت کو آگاہ کیا کہ دائر کی گئی تین درخواستوں میں سے دو واپس لی جا رہی ہیں، جبکہ باقی درخواست کے ذریعے ریٹرننگ آفیسر سے انتخابی ریکارڈ کی فراہمی کی استدعا کی گئی ہے۔ وکیل کا کہنا تھا کہ درخواست گزار اپنا بنیادی معاملہ الیکشن ٹربیونل میں لے جانا چاہتی ہیں، تاہم اس سے قبل ریکارڈ کا حصول ضروری ہے۔

(جاری ہے)

اس موقع پر الیکشن کمیشن کے حکام نے بتایا کہ بیشتر انتخابی ریکارڈ ریٹرننگ آفیسر کی جانب سے سیل کیا جا چکا ہے۔ چیف الیکشن کمشنر نے ریمارکس دیے کہ الیکشن کمیشن ریٹرننگ آفیسر کو ہدایات جاری کر دے گا اور جو ریکارڈ دستیاب ہوگا وہ درخواست گزار کو فراہم کیا جائے گا۔ فریقین کے دلائل سننے کے بعد الیکشن کمیشن نے معاملے پر فیصلہ محفوظ کر لیا، جس کا اعلان بعد میں کیا جائے گا۔ سماعت کے دوران بینچ نے اس بات پر زور دیا کہ قانونی تقاضوں کے مطابق شفافیت کو یقینی بنایا جائے گا اور درخواست گزار کو قانون کے دائرے میں رہتے ہوئے ریلیف فراہم کرنے پر غور کیا جائے گا۔