جہانگیر بارا کی طرف سے صحاٖفیوں کی تنظیم پہچان کے اعزاز میں ظہرانہ

لاہور (اُردو پوائنٹ اخبارتازہ ترین۔ 29 دسمبر 2025ء) صحافیوں، ایڈیٹرز اور کالم نگاروں کے پلیٹ فارم “پہچان” کے زیرِ اہتمام ایک پروقار ظہرانے کا انعقاد کیا گیا، جس میں ملک کے سینئر، معتبر اور فعال صحافیوں کی بڑی تعداد نے شرکت کی۔ اس ظہرانے کا مقصد باہمی روابط کو مضبوط بنانا، صحافتی مسائل پر تبادلۂ خیال اور اظہارِ رائے کی آزادی، پیشہ ورانہ ذمہ داریوں اور درپیش چیلنجز پر سنجیدہ گفتگو تھا۔

اس موقع پر اظہارِ خیال کرتے ہوئے نوید چودھری نے کہا کہ “پہچان جیسے پلیٹ فارم صحافیوں کو ایک دوسرے کے قریب لانے کے ساتھ ساتھ پیشہ ورانہ اخلاقیات اور صحافت کے اصل مقصد کی یاد دہانی کراتے ہیں۔ موجودہ دور میں صحافت کو جن دباؤ اور مشکلات کا سامنا ہے، ان سے نمٹنے کے لیے باہمی اتحاد ناگزیر ہے۔”
سینئر صحافی محسن گورائیہ کا کہنا تھا کہ صحافت محض خبر دینے کا نام نہیں بلکہ سچ، عوامی شعور اور سماجی ذمہ داری کا تقاضا بھی ہے۔

انہوں نے کہا کہ ایسے اجتماعات نوجوان صحافیوں کے لیے رہنمائی اور سینئرز کے تجربات سے استفادے کا مؤثر ذریعہ بنتے ہیں۔
معروف مصنف اور کالم نگار ذبیح اللہ بلگن نے گفتگو کرتے ہوئے کہا کہ صحافت آج ایک نازک موڑ پر کھڑی ہے، جہاں سچ بولنا مشکل اور خاموش رہنا آسان بنا دیا گیا ہے۔ ان کے مطابق “پہچان” جیسے پلیٹ فارم صحافیوں کو یاد دلاتے ہیں کہ اصل پہچان اصول، دیانت اور عوام کے ساتھ کھڑے رہنے سے بنتی ہے، نہ کہ وقتی مفادات سے۔

سینئر صحافی اشرف سہیل نے اس موقع پر گفتگو کرتے ہوئے کہا کہ صحافت کو درپیش اصل چیلنج صرف پابندیاں نہیں بلکہ اندرونی کمزوریاں بھی ہیں۔ ان کے مطابق اگر صحافی خود کو پیشہ ورانہ اصولوں اور سچائی سے جوڑ کر رکھیں تو کوئی دباؤ انہیں اپنی ذمہ داری سے نہیں ہٹا سکتا۔
عرفان اطہر کا کہنا تھا کہ “پہچان” جیسے پلیٹ فارم صحافیوں کے درمیان فکری ہم آہنگی پیدا کرتے ہیں، جو اس دور میں نہایت ضروری ہے۔

انہوں نے کہا کہ صحافت کو شخصیات کے بجائے اقدار کے گرد منظم کرنے کی ضرورت ہے۔
جبکہ شاہد نذیر چودھری نے اس بات پر زور دیا کہ صحافیوں کو اختلافِ رائے کے باوجود ایک دوسرے کے لیے برداشت اور احترام کو فروغ دینا ہوگا۔ ان کے مطابق صحافتی اتحاد ہی آزادیٔ اظہار کے تحفظ کی ضمانت بن سکتا ہے۔
دیگر شرکاء نے بھی اس بات پر اتفاق کیا کہ صحافتی برادری کو درپیش معاشی دباؤ، ادارہ جاتی کمزوریوں اور آزادیٔ اظہار پر قدغن جیسے مسائل پر مشترکہ حکمتِ عملی کی ضرورت ہے۔

ظہرانے کے دوران غیر رسمی نشستوں میں ماضی کی صحافت، موجودہ میڈیا کے رجحانات اور مستقبل کے لائحہ عمل پر تفصیلی تبادلۂ خیال بھی کیا گیا۔
آخر میں شرکاء نے اس عزم کا اظہار کیا کہ “پہچان” پلیٹ فارم کے تحت آئندہ بھی ایسی نشستوں کا انعقاد کیا جائے گا تاکہ صحافی برادری کو ایک مضبوط، باوقار اور باخبر آواز فراہم کی جا سکے۔