یو اے ایف اور سنکیانگ زرعی یونیورسٹی نے کنفیوشس انسٹیٹیوٹ پلان2026 کی منظوری دیدی

جمعہ 9 جنوری 2026 14:58

فیصل آباد (اُردو پوائنٹ اخبارتازہ ترین - این این آئی۔ 09 جنوری2026ء) یونیورسٹی آف ایگریکلچر فیصل آباد (یو اے ایف) میں قائم کنفیوشس انسٹیٹیوٹ نے 2026 کے لیے اپنے منصوبوں کی منظوری دے دی ہے، جن میں چینی زبان کی تدریس کے دائرہ کار کو وسعت دینا شامل ہے۔ یہ فیصلہ گزشتہ روز ہونے والے بورڈ اجلاس میں کیا گیا جو ہائبرڈ انداز میں منعقد ہوا۔گوادر پرو کے مطابق اجلاس کی مشترکہ صدارت یو اے ایف کے وائس چانسلر ذوالفقار علی اور سنکیانگ زرعی یونیورسٹی کے صدر ڑینگ وین شِن نے کی۔

(جاری ہے)

بورڈ کے اراکین نے انسٹیٹیوٹ کی 2025 کی سالانہ رپورٹ اور 2026 کے ورک پلان کی منظوری دی، جبکہ نظم و نسق اور تعلیمی رابطہ کاری کو مضبوط بنانے کے لیے نئے بورڈ اراکین کی توثیق بھی کی گئی۔اجلاس میں نئے تدریسی مراکز قائم کرنے اور اسکول الحاقی پروگرام شروع کرنے پر بھی اتفاق کیا گیا، جس کا مقصد پاکستان بھر میں چینی زبان کے کورسز اور ثقافتی تبادلوں تک رسائی کو وسعت دینا ہے۔قیام کے بعد سے اب تک یہ انسٹیٹیوٹ 22 ہزار 500 سے زائد پاکستانی طلبہ کو زبان اور ثقافتی پروگراموں میں داخلہ دے چکا ہے، جبکہ 12 ہزار سے زیادہ امیدواروں کے لیے ایچ ایس کی/ایچ ایس کے کے امتحانات کا انعقاد بھی کر چکا ہے۔