پولیس کی رکاوٹوں کے باوجود ایس یو پی کے صدر زین شاہ کی قیادت میں کارکنوں کی بڑی تعداد کشتی پر سوارہوکر سن پہنچ گئی

ہفتہ 17 جنوری 2026 16:50

نواب شاہ (اُردو پوائنٹ اخبارتازہ ترین - این این آئی۔ 17 جنوری2026ء) نواب شاہ: پولیس کی جانب سے مختلف سڑکوں پر کھڑی کی گئی رکاوٹیں بھی سندھ یونائیٹڈ پارٹی کے کارکنوں کا راستہ روک نہ سکیں، ایس یو پی کے صدر سید زین شاہ کی قیادت میں کارکن کشتیوں کے ذریعے دریائے سندھ کا راستہ اختیار کرتے ہوئے سن پہنچ گئے۔تفصیلات کے مطابق سندھ میں تحریکِ پاکستان کے بانی رہنما سائیں جی ایم سید کی 122ویں سالگرہ کی تقریبات کے سلسلے میں سندھ یونائیٹڈ پارٹی کے کارکن سن جانے کے لیے روانہ تھے کہ پولیس نے نواب شاہ سمیت مختلف مقامات پر سڑکیں بند کر کے رکاوٹیں کھڑی کر دیں۔

پولیس اقدامات کے بعد پارٹی قیادت نے متبادل راستہ اختیار کرنے کا فیصلہ کیا۔ترجمان سندھ یونائیٹڈ پارٹی نوید خواجہ کے مطابق صدر ایس یو پی سید زین شاہ اپنے قافلے میں شامل کارکنوں کے ہمراہ دریائے سندھ کے کنارے پہنچے اور کشتیوں میں سوار ہو کر سن کی جانب روانہ ہوئے۔

(جاری ہے)

مختلف کشتیوں پر پارٹی جھنڈے لگائے گئے تھے جبکہ کارکنوں نے نعرے بازی بھی کی۔

نوید خواجہ کا کہنا ہے کہ کارکنوں نے کشتیوں کے ذریعے رکاوٹیں توڑنے پر خوشی کا اظہار کیا اور پرجوش نعروں کے ساتھ اپنا سفر جاری رکھا۔ کچھ ہی دیر میں سید زین شاہ اور پارٹی کارکن سن پہنچ گئے اور دریا کے کنارے واقع رہائشگاہ پہنچ کر سائیں جی ایم سید کی 122ویں سالگرہ کی تقریبات میں شرکت کی۔ترجمان کے مطابق سندھ یونائیٹڈ پارٹی سائیں جی ایم سید کے افکار اور جدوجہد کو خراجِ عقیدت پیش کرنے کے لیے پرامن جدوجہد پر یقین رکھتی ہے اور کسی بھی رکاوٹ کے باوجود اپنی سرگرمیاں جاری رکھے گی۔