یو ایم ٹی میں پاکستان میں اعلی تعلیم کو درپیش چیلنجز ومواقع پر خصوصی سیمینار

ہفتہ 31 جنوری 2026 16:56

لاہور (اُردو پوائنٹ اخبارتازہ ترین - اے پی پی۔ 31 جنوری2026ء) یونیورسٹی آف مینجمنٹ اینڈ ٹیکنالوجی (یو ایم ٹی) میں پاکستان میں اعلی تعلیم کو درپیش مشکلات، پالیسی چیلنجز و مستقبل کے مواقع پر ایک خصوصی سیمینار کا انعقاد کیا گیا۔سیمینار یو ایم ٹی اور اکیڈیمیا میگزین کے باہمی اشتراک سے منعقد ہوا جس میں سابق چیئرمین ہائر ایجوکیشن کمیشن (ایچ ای سی) پروفیسر ڈاکٹر مختار احمد نے بطور مہمانِ خصوصی شرکت کی جبکہ ریکٹر یو ایم ٹی ایئر وائس مارشل (ر) ڈاکٹر آصف رضا، پرووسٹ یو ایم ٹی پروفیسر ڈاکٹر اصغر زیدی، ڈینز، ڈائریکٹرز،فیکلٹی ممبران اور طلبہ کی بڑی تعداد بھی موجود تھی۔

سیمینار کے دوران اعلی تعلیمی پالیسی، گورننس کے مسائل، اصلاحاتی راستوں اور جامعات کے قومی ترقی میں بدلتے ہوئے کردار پر تفصیلی مکالمہ کیا گیا۔

(جاری ہے)

پروفیسر ڈاکٹر مختار احمد نے خطاب کرتے ہوئے کہا کہ قومی ترقی میں جامعات کا کردار نہایت اہم ہو چکا ہے،تاہم پاکستانی جامعات کو سب سے بڑا چیلنج مو ئثر گورننس اور مضبوط پالیسی سازی کا درپیش ہے۔

انہوں نے نشاندہی کی کہ آبادیاتی دبائو ،جدید ٹیکنالوجی اور عالمی مسابقت اعلی تعلیم کے بڑے چیلنجز ہیں، جن سے نمٹنے کے لیے جامع اصلاحات ناگزیر ہیں۔پرووسٹ یو ایم ٹی پروفیسر ڈاکٹر اصغر زیدی نے کہا کہ مستقبل سے ہم آہنگ اور طالب علم دوست تعلیمی اداروں کی تشکیل وقت کی اہم ضرورت ہے۔ انہوں نے نوجوان نسل پر زور دیا کہ وہ جدید ٹیکنالوجی اور مصنوعی ذہانت (اے آئی) ٹولز کا محتاط، ذمہ دارانہ اور تعمیری استعمال کرے۔

ریکٹر یو ایم ٹی ڈاکٹر آصف رضا نے کہا کہ ایچ ای سی کی پالیسی سازی اور اصلاحات میں پروفیسر ڈاکٹر مختار احمد کا کردار کلیدی رہا ہے۔ انہوں نے زور دیا کہ قومی ترقی کے لیے تعلیم اور نوجوانوں میں سرمایہ کاری ناگزیر ہے۔سیمینار کے اختتام پر طلبہ کے ساتھ خصوصی سوال و جواب کا سیشن بھی منعقد کیا گیا، جس میں طلبہ نے اعلی تعلیم سے متعلق مختلف امور پر سوالات کیے۔ تقریب کے اختتام پر پرووسٹ یو ایم ٹی پروفیسر ڈاکٹر اصغر زیدی نے مہمانِ خصوصی پروفیسر ڈاکٹر مختار احمد کو یادگاری سووینئر پیش کیا۔