ا*عظیم شاعر اور انقلابی رہنما اجمل خٹک کو 16ویں برسی پر خراجِ عقیدت

yاجمل خٹک فکری جرات اور مزاحمت کی علامت تھے، میاں افتخار حسین ًاجمل خٹک کی جدوجہد آج بھی نوجوانوں کے لیے مشعل راہ ہے، رہنما اے این پی خیبر پختونخوا

ہفتہ 7 فروری 2026 20:30

uپشاور(اُردو پوائنٹ اخبارتازہ ترین - آن لائن۔ 07 فروری2026ء) عوامی نیشنل پارٹی خیبر پختونخوا کے صدر میاں افتخار حسین نے عظیم انقلابی شاعر، دانشور اور سیاسی رہنما اجمل خٹک کی 16ویں برسی کے موقع پر انہیں شاندار الفاظ میں خراجِ عقیدت پیش کرتے ہوئے کہا ہے کہ اجمل خٹک فکری جرات، مزاحمتی سیاست اور لازوال جدوجہد کا استعارہ تھے، جنہوں نے اپنی پوری زندگی محکوم اقوام بالخصوص پختون قوم کے حقوق اور شعور کے لیے وقف کر رکھی تھی۔

اپنے بیان میں میاں افتخار حسین نے کہا کہ عوامی نیشنل پارٹی کے سابق صدر اجمل خٹک صرف ایک شاعر نہیں بلکہ ایک پورا فکری عہد تھے۔ انہوں نے لفظ کو ہتھیار اور فکر کو مشعل بنا کر جبر، استحصال اور آمریت کے خلاف مسلسل جدوجہد کی۔ ان کا قلم ظالم کے لیے لرزہ اور مظلوم کے لیے حوصلے کا ذریعہ تھا۔

(جاری ہے)

انہوں نے کہا کہ جیلوں، تشدد، جلاوطنی اور ریاستی دباؤ کے باوجود اجمل خٹک کبھی اپنے نظریات سے پیچھے نہیں ہٹے اور ثابت کیا کہ اصولی سیاست وقتی مفادات کے لیے نہیں بلکہ تاریخ کا رخ موڑنے کے لیے ہوتی ہے۔

میاں افتخار حسین کے مطابق اجمل خٹک نے نہ صرف ادب بلکہ عملی سیاست میں بھی مزاحمت کی درخشاں مثال قائم کی۔ نیشنل عوامی پارٹی اور بعد ازاں عوامی نیشنل پارٹی کے پلیٹ فارم سے انہوں نے وفاقیت، جمہوریت، صوبائی خودمختاری اور مظلوم قومیتوں کے حقوق کے لیے بے مثال کردار ادا کیا۔انہوں نے مزید کہا کہ اجمل خٹک کی جدوجہد آج بھی سیاسی کارکنوں، خصوصاً نوجوان نسل کے لیے مشعلِ راہ ہے اور عوامی نیشنل پارٹی ان اکابرین کی قربانیوں، نظریات اور سیاسی جدوجہد کی امین ہے۔صوبائی صدر نے کہا کہ اگرچہ اجمل خٹک آج جسمانی طور پر ہم میں موجود نہیں، مگر ان کی فکر اور مزاحمتی روح آج بھی زندہ ہے اور آنے والی نسلوں کو راستہ دکھاتی رہے گی۔