محمد میاں سومرو کے پیپلز پارٹی سے رابطوں کی خبروں کے بعد سیاسی حلقوں میں ہلچل

جمعرات 26 مارچ 2026 17:49

جیکب آباد (اُردو پوائنٹ اخبارتازہ ترین - این این آئی۔ 26 مارچ2026ء) محمد میاں سومرو کے پیپلز پارٹی سے رابطوں کی خبروں کے بعد سیاسی حلقوں میں ہلچل مچ گئی ہے۔

(جاری ہے)

ذرائع کے مطابق سابق نگران وزیر اعظم اور چیئرمین سینیٹ محمد میاں سومرو کے پاکستان پیپلز پارٹی کی اعلیٰ قیادت سے رابطے جاری ہیں جس کے بعد سیاسی حلقوں میں ان کی ممکنہ شمولیت کے حوالے سے قیاس آرائیاں زور پکڑ گئی ہیں، ذرائع کا کہنا ہے کہ حالیہ دنوں میں ہونے والی غیر رسمی ملاقاتوں اور رابطوں نے اس امکان کو مزید تقویت دی ہے کہ محمد میاں سومرو جلد پیپلز پارٹی کا حصہ بن سکتے ہیں تاہم اس حوالے سے کوئی حتمی فیصلہ تاحال سامنے نہیں آیا، دوسری جانب جب صحافیوں نے محمد میاں سومرو سے پیپلز پارٹی میں شمولیت کے بارے میں سوال کیا تو انہوں نے نہ تو ان خبروں کی تصدیق کی اور نہ ہی تردید بلکہ محتاط انداز اپناتے ہوئے کہا کہ ’’مستقبل کا علم اللہ تعالیٰ کو ہی ہے‘‘، جسے سیاسی مبصرین ایک معنی خیز ردعمل قرار دے رہے ہیں، باخبر ذرائع کے مطابق محمد میاں سومرو کے سابق صدر آصف علی زرداری کے ساتھ دیرینہ خاندانی تعلقات ہیں جو اس ممکنہ سیاسی پیش رفت میں اہم کردار ادا کر سکتے ہیں اس کے علاوہ ماضی میں ان کے اسٹیبلشمنٹ کے ساتھ قریبی روابط بھی رہے ہیں جس کے باعث انہیں ملکی سیاست میں ایک بااثر اور متوازن شخصیت کے طور پر دیکھا جاتا ہے، واضح رہے کہ محمد میاں سومرو ملکی سیاست میں اہم عہدوں پر فائز رہ چکے ہیں جن میں گورنر سندھ، چیئرمین سینیٹ ، وفاقی وزیر اور نگران وزیر اعظم جیسے اعلیٰ مناصب شامل ہیں ان کی ممکنہ سیاسی وابستگی میں تبدیلی آئندہ دنوں میں ملکی سیاسی منظرنامے پر نمایاں اثر ڈال سکتی ہے۔