ایچ بی ایل پی ایس ایل ٹورنامنٹ کی بہترین ٹیم کا اعلان کر دیا گیا، پشاور زلمی اور حیدرآباد کنگز مین کے تین، تین کھلاڑی شامل

پیر 4 مئی 2026 18:48

لاہور (اُردو پوائنٹ اخبارتازہ ترین - اے پی پی۔ 04 مئی2026ء) ایچ بی ایل پی ایس ایل ٹورنامنٹ کی بہترین ٹیم کا اعلان کر دیا گیا ، قیادت ٹائٹل جیتنے والی ٹیم کے کپتان بابر اعظم کو سونپی گئی ہے۔ انہوں نے بطور کپتان اور بلے باز شاندار کارکردگی کا مظاہرہ کرتے ہوئے اپنی ٹیم کو کامیابی دلائی ۔ ٹیم آف دی ٹورنامنٹ میں پشاور زلمی اور حیدرآباد کنگز مین کے تین، تین کھلاڑی جبکہ لاہور قلندرز اور اسلام آباد یونائیٹڈ کے دو، دو کھلاڑی شامل ہیں۔

ملتان سلطانز اور کوئٹہ گلیڈی ایٹرز سے ایک، ایک کھلاڑی کو بھی ٹیم میں جگہ ملی ہے۔بابر اعظم نے ایونٹ میں 588 رنز بنا کر فخر زمان کے ایک سیزن میں سب سے زیادہ رنز کے ریکارڈ کی برابری کی اور حنیف محمد کیپ اپنے نام کی۔ انہوں نے ٹورنامنٹ میں دو سنچریاں بھی اسکور کیں۔

(جاری ہے)

ان کے ساتھ کسل مینڈس اور صفیان مقیم بھی پشاور زلمی کی ٹیم میں شامل ہیں۔

مینڈس نے 550 رنز بنائے جبکہ صفیان نے 22 وکٹیں حاصل کر کے بہترین باولر اور پلیئر آف دی ٹورنامنٹ کا اعزاز حاصل کیا۔حیدرآباد کنگز مین کی جانب سے عثمان خان، حسن خان اور حنین شاہ کو شامل کیا گیا ہے۔ لاہور قلندرز کے شاہین شاہ آفریدی اور فخر زمان بھی ٹیم کا حصہ ہیں۔ملتان سلطانز کے شان مسعود نے 367 رنز بنا کر ٹیم میں جگہ بنائی، جبکہ اسلام آباد یونائیٹڈ کے کپتان شاداب خان نے آل راونڈ کارکردگی کے باعث ٹیم میں شمولیت اختیار کی۔

ان کے ساتھ انگلینڈ کے فاسٹ بالر رچرڈ گلیسن بھی شامل ہیں۔ کوئٹہ گلیڈی ایٹرز کے حسن نواز کو 12ویں کھلاڑی کے طور پر منتخب کیا گیا ہے۔اسی طرح ایمرجنگ ٹیم آف دی ٹورنامنٹ کا بھی اعلان کیا گیا، جس میں سمیر منہاس، فرحان یوسف اور علی رضا سمیت کئی ابھرتے ہوئے کھلاڑی شامل ہیں، جنہوں نے ایونٹ میں غیر معمولی کارکردگی کا مظاہرہ کیا۔