روٹ ٹو مکہ انیشیٹو سے سفرِ حج میں غیرمعمولی آسانیاں پیدا ہوئیں، بنگلہ دیشی عازمین

منگل 5 مئی 2026 12:06

ریاض (اُردو پوائنٹ اخبارتازہ ترین - اے پی پی۔ 05 مئی2026ء) بنگلہ دیش سے آنے والے عازمینِ حج نےروٹ ٹو مکہ انیشیٹو کی تعریف کرتے ہوئے ہے کہا ہے کہ اِس اقدام سے سفرِ حج میں غیرمعمولی آسانیاں پیدا ہوئی ہیں۔اردو نیوز کے مطابق روٹ ٹُو مکہ انیشیٹو سعودی وژن 2030 سے ہم آہنگ پِلگِرم ایکسپیرئنس پروگرام کے تحت وزارتِ داخلہ کی کوششوں کا حصہ ہے۔یہ انیشیٹو آٹھ سال قبل شروع کیا گیا تھا جو کامیابی سے جاری ہے جبکہ بنگلہ دیش میں اِس کا آغاز چھ سال قبل ڈھاکہ کے حضرت شاہ جلال بین الاقوامی ایئرپورٹ سے ہوا۔

رواں سال اِس انیشیٹو کے تحت دس ممالک میں داخلے کے 17 بین الاقوامی پوائنٹس پر خدمات فراہم کی جائیں گی۔ وہ ممالک جو روٹ ٹُو مکہ انیشیٹو سے مستفید ہونے جا رہے ہیں ان میں سینگال اور برونائی دارالسلام بھی شامل ہیں۔

(جاری ہے)

پروگرام کے تحت عازمینِ حج کو سفری سہولیات پہنچانے کے لیے الیکٹرانک ویزا جاری ، صحت کی شرائط کی پڑتال آن لائن ، پاسپورٹ و بائیومیٹرک کی کارروائی روانگی کے مقام پر ہی مکمل کر لی جاتی ہے۔

خصوصی ٹیگنگ کا بندوبست بھی اسی روٹ ٹُو مکہ انیشیٹیو کے تحت کیا جاتا ہے جبکہ عازمینِ حج کے سامان کی ترسیل مکہ مکرمہ اور مدینہ منورہ میں اُن کے مقامِ رہائش پر براہِ راست کر دی جاتی ہے۔بنگلہ دیشی عازمینِ حج نے سعودی ٹیم کی کارکردگی اور مصنوعی ذہانت سے چلنے والی ڈیوائسز کے استعمال کی تعریف کرتے ہوئے کہا کہ اِس سے وقت اور کوشش دونوں کی بچت ہوتی ہے۔

اُنھوں نے کہا کہ اِس انیشیٹو سے عازمین سعودی ایئرپورٹس سے براہِ راست اپنی قیام گاہوں کو منتقل ہو جاتے ہیں اور اُنھیں اپنے سامان کے لیے عام حالات میں ضروری طریقوں کا انتظار بھی نہیں کرنا پڑتا۔روٹ ٹُو مکہ انیشیٹو اور اِس کا منظم طریقہ ظاہر کرتا ہے کہ مملکت عازمینِ حج کے سفر کو آرام دہ اور خدمات کے معیار کو بہتر بنانے کے لیے پُرعزم ہے۔