سوڈان کے بحران کا کوئی فوجی حل نہیں، امریکا

واشنگٹن (اُردو پوائنٹ اخبارتازہ ترین - اے پی پی۔ 13 مئی2026ء) امریکا نے کہا ہے کہ سوڈان کے بحران کا کوئی فوجی حل نہیں ۔ العربیہ اردو کے مطابق یہ بات امریکی صدر کے مشیر برائے عرب و افریقی امور مسعد بولس نے ایک بیان میں کہی۔ انہوں نے اس بات پر زور دیا کہ زمینی منظر نامے کی پیچیدگیوں اور سوڈانی فوج اور ریپڈ سپورٹ فورسز کے درمیان جاری لڑائی کے باوجود کشیدگی کے خاتمے کے لیے سیاسی راستے پر واپسی ضروری ہے۔

انہوں نے کہا کہ جرمنی کا حالیہ اعلامیہ سوڈان کے بحران کے حل کے لیے اہم روڈ میپ ہے، یہ اعلامیہ ایسی بنیاد فراہم کرتا ہے جس پر سیاسی تصفیے کی کوششوں کو بحال کرنے اور بڑھتے انسانی المیے کو روکنے کے لیے کام کیا جا سکتا ہے۔ انہوں نے کہا کہ اس وقت بنیادی مسئلہ تنازعے کے دونوں فریقوں کے درمیان مذاکرات کی میز پر بیٹھنے کے لیے ارادے کا فقدان ہے جو بڑھتے ہوئے بین الاقوامی دباؤ کے باوجود سوڈانی فوج اور ریپڈ سپورٹ فورسز کے درمیان دوری کی طرف اشارہ ہے۔

(جاری ہے)

امریکی عہدیدار نے واضح کیا کہ سوڈان کے بحران کے کسی حل تک پہنچنے کے لیے مزید وقت درکار ہے اور امریکا اپنے علاقائی اور بین الاقوامی شراکت داروں کے ساتھ مل کر فریقین کو ایک پائیدار سیاسی تصفیے کی طرف لانے کے لیے اب بھی کام کر رہا ہے۔ انہوں زور دے کر کہا کہ امریکا سوڈان میں کسی بھی متوازی حکومت کو تسلیم نہیں کرے گا۔ یہ موقف واشنگٹن کی جانب سے ان تمام اقدامات کی مخالفت کی عکاسی کرتا ہے جو اقتدار کی تقسیم یا ملک کے اندر سیاسی و جغرافیائی تقسیم کو ہوا دینے کا سبب بن سکتے ہیں۔

انہوں نے اس بات کی تصدیق کی کہ امریکا اس وقت سوڈان کی وحدت کو برقرار رکھنے اور ہر اس راستے کی حمایت کرنے پر توجہ مرکوز کیے ہوئے ہے جو کشیدگی کے خاتمے اور سیاسی عمل کی واپسی کا باعث بنے۔ امریکی مشیر نے یہ بھی انکشاف کیا کہ امریکا کے پاس کئی ایسے آپشنز ہیں جنہیں سوڈان کے بحران کے حل کے لیے دباؤ ڈالنے کی خاطر فعال کیا جا سکتا ہے، تاہم انہوں نے ان آپشنز کی نوعیت یا ان کے استعمال کے وقت کے بارے میں کچھ نہیں بتایا۔

انہوں نے عام شہریوں تک انسانی امداد کی رسائی کو آسان بنانے کی اپیل کی اور اس بات پر زور دیا کہ کشیدگی اور متعدد علاقوں میں نقل مکانی اور بھوک کے پھیلاؤ کے ساتھ سوڈان میں انسانی صورتحال انتہائی خراب ہوتی جا رہی ہے۔ واضح رہے کہ سوڈان کو دنیا کے بد ترین انسانی بحرانوں میں سے ایک کا سامنا ہے کیونکہ اپریل 2023 سے جاری کشیدگی نے ہزاروں افراد کی جان لی ہے اور لاکھوں شہریوں کو بے گھر کر دیا ہے۔