حکومت نے ملک میں جاری گیس بحران پر قابو پانے کیلئے ایکشن پلان تیار کر لیا

توانائی شعبے میں بنیادی اصلاحات ،ادارہ جاتی ہم آہنگی کو ترجیح دی جائے گی نیشنل کوآرڈنیشن اینڈ مینجمنٹ کونسل گیس فراہمی، قیمتوں کے تعین ،طلب و رسد معاملات کی براہِ راست نگرانی کرے گی

منگل 5 مئی 2026 21:55

اسلام آباد (اُردو پوائنٹ اخبارتازہ ترین - این این آئی۔ 05 مئی2026ء) حکومت نے ملک میں جاری گیس بحران پر قابو پانے کے لیے بڑا ایکشن پلان تیار کر لیا جس کے تحت توانائی شعبے میں بنیادی اصلاحات اور ادارہ جاتی ہم آہنگی کو ترجیح دی جائے گی، وزیراعظم کی ہدایت پر نیشنل کوآرڈنیشن اینڈ مینجمنٹ کونسل گیس کی فراہمی، قیمتوں کے تعین اور طلب و رسد کے معاملات کی براہِ راست نگرانی کرے گی۔

ذرائع کے مطابق پاور ٹاسک فورس کے تمام اقدامات کو اب نئی کونسل کے ماتحت لایا جائے گا۔

(جاری ہے)

وزیراعظم نے سیکرٹری پیٹرولیم سے گیس اصلاحات پر تفصیلی پیشرفت رپورٹ 8مئی تک طلب کر لی ۔ حکومت نے فیصلہ کیا ہے کہ گیس کی سپلائی بہتر ہونے تک نئے ایل این جی کنکشنز معطل رہیں گے۔ مقامی پیداوار بڑھانے کے لیے ماڑی، او جی ڈی سی ایل، پی پی ایل اور مول کمپنیوں سے ہفتہ وار رپورٹ طلب کی گئی ہے۔

نئی حکمت عملی کے تحت گھریلو صارفین کے لیے لوڈشیڈنگ کے اوقات کا ازسرِ نو جائزہ لیا جائے گا ۔ ذرائع کے مطابق مہنگی درآمدی گیس کے بجائے سستی مقامی گیس کے استعمال کو فروغ دینے کا فیصلہ کیا گیا ہے۔ اوگرا اور متعلقہ ٹاسک فورس کو گیس کی موجودہ قیمتیں برقرار رکھنے اور اضافی آمدن کے لیے مالی اثرات کا تخمینہ لگانے کی بھی ہدایت جاری کر دی گئی ۔