نیوزی لینڈ میں 2027 سے تارکینِ وطن کے لیے شہریت کا امتحان پاس کرنا لازمی

بدھ 6 مئی 2026 10:02

ولنگٹن (اُردو پوائنٹ اخبارتازہ ترین - اے پی پی۔ 06 مئی2026ء) نیوزی لینڈ کے وزیرِ داخلہ بروک وین ویلڈن نے کہا ہے کہ جو افراد شہریت حاصل کرنا چاہتے ہیں انہیں حکومت اور انسانی حقوق جیسے موضوعات پر مبنی امتحان پاس کرنا ہوگا۔ اردو نیوز کے مطابق انہوں نے کہا کہ یہ امتحان بالمشافہ لیا جائے گا اور اس میں 20 مختصر سوالات شامل ہوں گے، جن میں سے کم از کم 15 درست جواب دینا لازمی ہوگا۔

سوالات میں بل آف رائٹس ایکٹ، انسانی حقوق، بعض فوجداری جرائم، ووٹ کا حق، جمہوری اصول، حکومتی ڈھانچہ اور نیوزی لینڈ کے سفر سے متعلق موضوعات شامل ہوں گے۔

(جاری ہے)

انہوں نے کہا کہ شہریت حاصل کرنے والے افراد کو یہ سمجھنا چاہیے کہ نیوزی لینڈ کے عوام کچھ بنیادی حقوق پر یقین رکھتے ہیں جیسے آزادیِ اظہار، یا یہ کہ کوئی فرد یا گروہ قانون سے بالاتر نہیں ہے۔

انہوں نے کہا کہ یہ امتحان اس بات کو یقینی بنائے گا کہ لوگ شہریت حاصل کرنے سے پہلے اپنی ذمہ داریوں اور مراعات کے بارے میں کافی علم رکھتے ہوں۔ فی الحال درخواست دہندگان کو صرف ایک بیان پر دستخط کرنا ہوتے ہیں کہ وہ شہری ہونے کی ذمہ داریوں اور مراعات کو سمجھتے ہیں۔ مزید تفصیلات محکمہ داخلہ تیار کر رہا ہے اور یہ امتحان 2027 کی دوسری ششماہی میں لازمی شرط بن جائے گا۔