فیفا ورلڈ کپ 2026،سکواڈز کا اعلان 2 جون کوہوگا، ہر ٹیم میں 26 کھلاڑی شامل ہوں گے

بدھ 6 مئی 2026 23:14

زیورخ (اُردو پوائنٹ اخبارتازہ ترین - اے پی پی۔ 06 مئی2026ء) فٹ بال کی عالمی تنظیم (فیفا) نے اعلان کیا ہے کہ فیفا ورلڈ کپ 2026 کے لئے شریک 48 ٹیموں کے حتمی سکواڈز کا باضابطہ اعلان 2 جون کو کیا جائے گا۔امریکی خبر رساں ادارے ای ایس پی این کے مطابق ہر ٹیم کو 26 کھلاڑیوں پر مشتمل سکواڈ رکھنے کی اجازت ہوگی، جو 2022 کے ٹورنامنٹ کی طرح برقرار رکھی گئی ہے۔

فیفا کے قواعد کے تحت ابتدائی طور پر تمام ٹیمیں 35 سے 55 کھلاڑیوں پر مشتمل ایک عارضی فہرست جمع کرائیں گی، جس میں کم از کم 4 گول کیپر شامل ہوں گے۔ یہ فہرست صرف اندرونی استعمال کے لیے ہوگی اور اسے عوام کے سامنے جاری نہیں کیا جائے گا۔بعد ازاں ہر ٹیم 23 سے 26 کھلاڑیوں پر مشتمل حتمی سکواڈ پیش کرے گی، جس میں کم از کم 3 گول کیپر ہونا لازمی ہوں گے۔

(جاری ہے)

قواعد کے مطابق اگر کسی کھلاڑی کو شدید چوٹ یا بیماری لاحق ہو جائے تو ٹیم اپنے پہلے میچ سے 24 گھنٹے قبل تک عارضی فہرست میں شامل کسی کھلاڑی کو اس کی جگہ شامل کر سکتی ہے۔ البتہ گول کیپر کو ٹورنامنٹ کے دوران بھی تبدیل کرنے کی اجازت ہوگی، بشرطیکہ وہ عارضی فہرست میں شامل ہو۔قومی ٹیموں کو اپنے سکواڈز کا اعلان کسی بھی وقت کرنے کی اجازت ہے، تاہم انہیں اس وقت تک حتمی نہیں سمجھا جائے گا جب تک فیفا 2 جون کو ان کی باضابطہ منظوری نہ دے دے۔

فیفا کے مطابق کھلاڑیوں کی بروقت دستیابی یقینی بنانے کے لیے 25 مئی 2026 سے ریلیز اور تیاری کا مرحلہ شروع ہوگا، جو ان کے کلب کے آخری میچ کے اگلے دن سے نافذ ہوگا۔ بعض صورتوں میں، کنفیڈریشن کے کلب فائنلز کھیلنے والے کھلاڑیوں کو 30 مئی 2026 تک استثنا دیا جا سکتا ہے، جس کے لیے فیفا کی منظوری ضروری ہوگی۔