سکیورٹیز اینڈ ایکسچینج کمیشن آف پاکستان کی سرپرستی میں کیپٹل مارکیٹ ڈویلپمنٹ فنڈ قائم

اسلام آباد (اُردو پوائنٹ اخبارتازہ ترین - اے پی پی۔ 06 مئی2026ء) سکیورٹیز اینڈ ایکسچینج کمیشن آف پاکستان (ایس ای سی پی) کی سرپرستی میں کیپٹل مارکیٹ ڈویلپمنٹ فنڈ قائم کر دیا گیا۔ اس ضمن میں پاکستان کی کیپٹل مارکیٹ کے اداروں پاکستان سٹاک ایکسچینج، سینٹرل ڈیپازٹری کمپنی، نیشنل کلیئرنگ کمپنی آف پاکستان لمیٹڈ، پاکستان مرکنٹائل ایکسچینج اور انسٹیٹیوٹ آف فنانشل مارکیٹس آف پاکستان نے کیپٹل مارکیٹ ڈویلپمنٹ فنڈ کے قیام کے لیے ایک معاہدے پر دستخط کیے۔

سکیورٹیز اینڈ ایکسچینج کمیشن آف پاکستان (ایس ای سی پی) کی سرپرستی میں قائم کیے گئے کیپٹل مارکیٹ ڈویلپمنٹ فنڈ کا مقصد کیپٹل مارکیٹ میں سرمایہ کاروں کی تعداد بڑھانا، خصوصاً نوجوانوں میں مالیاتی آگاہی پیدا کرنا، سرمایہ کاری کے عمل کو آسان بنانا اور کیپٹل مارکیٹ میں اصلاحات کو فروغ دینا ہے۔

(جاری ہے)

معاہدے پر دستخط کی تقریب ایس ای سی پی کے صدر دفتر میں منعقد ہوئی جس میں وفاقی وزیر خزانہ و محصولات سینیٹر محمد اورنگزیب نے مہمان خصوصی کی حیثیت سے شرکت کی۔

فنڈ کے قیام کے معاہدے پر پاکستان سٹاک ایکسچینج کے چیف ایگزیکٹو فرخ ایچ سبزواری، سینٹرل ڈیپازٹری کمپنی کے چیف ایگزیکٹو بدیع الدین اکبر، نیشنل کلیئرنگ کمپنی کے چیف ایگزیکٹو نوید قاضی، پاکستان مرکنٹائل ایکسچینج کے چیف ایگزیکٹو خرم ظفر اور انسٹیٹیوٹ آف فنانشل مارکیٹس کے چیف ایگزیکٹو ڈاکٹر مبشر صادق نے دستخط کیے۔اس موقع پر چیئرمین ایس ای سی پی ڈاکٹر کبیر احمد سدھو اور کمشنرز امتیاز حیدر، مظفر مرزا، ذیشان خٹک اور علی فرید بھی موجود تھے۔

چیئرمین ایس ای سی پی ڈاکٹر کبیر احمد سدھو نے کہا کہ حالیہ ترقی کے باوجود پاکستان کی کیپٹل مارکیٹ میں سرمایہ کاروں کی تعداد ملک کی مجموعی آبادی کے ایک فیصد سے بھی کم ہے۔ انہوں نے بتایا کہ کمیشن نے سٹرکچرل اصلاحات کے ذریعے آئندہ چند برسوں میں سرمایہ کاروں کی تعداد 25 لاکھ تک بڑھانے کا ہدف مقرر کیا ہے۔انہوں نے کہا کہ کیپٹل مارکیٹ میں سرمایہ کاروں کی آن بورڈنگ کو آسان بنایا جا رہا ہے جبکہ سرمایہ کاروں کے اعتماد اور مارکیٹ سے متعلق بہتر آگاہی کے لیے کیپٹل مارکیٹ ڈویلپمنٹ فنڈ کے ذریعے قومی سطح پر مربوط اقدامات کیے جائیں گے۔

تقریب میں پیش کئے گئے اعداد و شمار کے مطابق اپریل 2026ء کے دوران تقریباً 24 ہزار نئے سرمایہ کار مارکیٹ میں شامل ہوئے۔ ایکویٹی مارکیٹ میں مثبت رجحان برقرار رہا جبکہ ڈیٹ کیپٹل مارکیٹ میں نسبتاً سست روی دیکھی گئی جس سے موثر نگرانی اور ڈیٹا پر مبنی پالیسی اقدامات کی ضرورت اجاگر ہوئی۔انسٹیٹیوٹ آف فنانشل مارکیٹس کے چیف ایگزیکٹو ڈاکٹر مبشر صادق نے فنڈ کے سٹریٹجک فریم ورک پر بریفنگ دیتے ہوئے بتایا کہ یہ فنڈ ایک ’’رنگ فینسڈ‘‘ ادارہ جاتی نظام ہے جو طویل المدتی کیپٹل مارکیٹ ترقی کے لیے قائم کیا گیا ہے۔

انہوں نے کہا کہ فنڈ کا آغاز 12 کروڑ روپے کے ابتدائی سرمائے سے کیا جائے گا جبکہ کیپٹل مارکیٹ کے ادارے اپنی سالانہ آمدنی کا ایک فیصد اس فنڈ میں جمع کرائیں گے تاکہ اس کے تسلسل کو یقینی بنایا جا سکے۔