ضلعی انتظامیہ کے زیر اہتمام ساہیوال میں معرکہ حق کرکٹ میلہ کا انعقاد

ہفتہ 9 مئی 2026 16:56

سرگودھا (اُردو پوائنٹ اخبارتازہ ترین - اے پی پی۔ 09 مئی2026ء) ضلعی انتظامیہ کے زیر انتظام تحصیل ساہیوال (سرگودھا ) میں “مارکۂ حق کرکٹ میلہ” قومی جوش و جذبے کے ساتھ منعقد کیا گیا جس میں تحصیل کی چار بہترین ٹیموں اے سی الیون، ہیلتھ الیون، ایجوکیشن الیون اور جوڈیشری الیون نے حصہ لیا۔ ٹورنامنٹ کے دلچسپ اور سنسنی خیز مقابلوں کے بعد اے سی الیون نے شاندار کارکردگی کا مظاہرہ کرتے ہوئے ٹورنامنٹ اپنے نام کر لیا۔

تقریب کے مہمانِ خصوصی ممبر صوبائی اسمبلی بیرسٹر سردار تیمور علی خان اور اسسٹنٹ کمشنر ساہیوال خان شمس الرحمان تھے۔ ایم پی اے بیرسٹر سردار تیمور خان نے خطاب کرتے ہوئے کہا کہ مارکۂ حق کی کامیابی ہماری بہادر افواج کی پیشہ ورانہ مہارت، قربانیوں اور قومی عزم کی روشن مثال ہے۔

(جاری ہے)

انہوں نے کہا کہ کھیلوں کی سرگرمیاں نوجوانوں میں نظم و ضبط، اتحاد، ٹیم ورک اور حب الوطنی کے جذبات کو فروغ دیتی ہیں۔

انہوں نے تینوں مسلح افواج کی لازوال قربانیوں اور دفاعِ وطن کے لیے ان کے کردار کو زبردست خراجِ تحسین پیش کرتے ہوئے کہا کہ پوری قوم اپنی مسلح افواج کے ساتھ سیسہ پلائی دیوار کی مانند کھڑی ہےکرکٹ میلہ میں شہریوں اور شائقینِ کرکٹ کی بڑی تعداد نے شرکت کی اور کھلاڑیوں کی بھرپور حوصلہ افزائی کی۔ تقریب کے اختتام پر وطن عزیز کے شہداء کو خراجِ عقیدت پیش کیا گیا جبکہ ملکی سلامتی، ترقی اور استحکام کے لیے خصوصی دعا بھی کی گئی۔