محمد عباس ٹیسٹ کرکٹ میں وسیم اکرم اور وقار یونس سے بہتر اوسط کے مالک پاکستانی فاسٹ بائولر بن گئے

محمد عباس اب تک 216 فرسٹ کلاس میچوں میں 20.34 کی اوسط سے 880 وکٹیں لے چکے ہیں

ذیشان مہتاب اتوار 10 مئی 2026 11:57

محمد عباس ٹیسٹ کرکٹ میں وسیم اکرم اور وقار یونس سے بہتر اوسط کے مالک ..

لاہور (اردو پوائنٹ تازہ ترین اخبار ۔ 10 مئی 2026ء ) پاکستان کے ٹیسٹ فاسٹ باولر محمد عباس ٹیسٹ کرکٹ میں وسیم اکرم اور وقار یونس سے بھی بہتر اوسط کے مالک پاکستانی فاسٹ بائولر بن گئے ہیں۔

ٹیسٹ فاسٹ بولر محمد عباس نے ڈھاکا ٹیسٹ کی پہلی اننگز میں شاندار باولنگ کرتے ہوئے 92 رنز دیکر 5 وکٹیں حاصل کیں۔

36 سالہ محمد عباس اپنا 28واں ٹیسٹ کھیل رہے ہیں اور اب تک 22.95 کی شاندار اوسط سے 105 وکٹیں اپنے نام کرچکے ہیں۔

محمد عباس اب تک 216 فرسٹ کلاس میچوں میں 20.34 کی اوسط سے 880 وکٹیں لے چکے ہیں ،محمد عباس نے اپنے فرسٹ کلاس کیریئر میں 56ویں مرتبہ اننگز میں 5 شکار کیے۔

پاکستان کے لیے بہترین ٹیسٹ اوسط کے مالک لیجنڈری آل رائونڈر اور سابق کپتان عمران خان ہیں جنہوں نے اپنے ٹیسٹ کیریئر میں 88 میچز میں 22.81 کی اوسط سے 362 وکٹیں حاصل کیں۔

(جاری ہے)

وقار یونس 23.56 کی اوسط سے 373 ٹیسٹ وکٹیں لیکر اس فہرست میں تیسرے ، وسیم اکرم 23.62 کی اوسط سے 414 شکار کرکے چوتھے، محمد آصف 24.36 کی اوسط سے 106 وکٹیں لیکر پانچویں جب کہ فضل محمود 24.70 کی اوسط سے 139 شکار کرکے چھٹے نمبر پر ہیں۔

پاکستان کی جانب سے فرسٹ کلاس کرکٹ میں سب سے زیادہ وکٹیں لینے والے پیسر لیجنڈری آل رائونڈر اور سابق کپتان اور وزیر اعظم عمران خان ہیں جنہوں نے 382 میچز میں 1287 وکٹیں حاصل کررکھی ہیں۔

وسیم اکرم 257 فرسٹ کلاس میچز میں 1042 وکٹیں لیکر اس فہرست میں دوسرے، سرفراز نواز 299 میچز میں 1005 وکٹوں کے ساتھ تیسرے جب کہ وقار یونس 228 میچز میں 956 وکٹیں لیکر چوتھے نمبر پر ہیں۔

2017ء میں اپنا ٹیسٹ ڈیبیو کرنے کے بعد عباس 2021ء تک پاکستان کے ٹیسٹ سیٹ اپ میں ایک باقاعدہ حصہ تھے جس کے بعد انہیں ایک اور ٹیسٹ کھیلنے کے لیے تین سال سے زیادہ انتظار کرنا پڑا۔

دسمبر 2024ء میں جنوبی افریقہ کے خلاف واپسی پر پہلے ٹیسٹ میں انہوں نے 54 رنز دیکر 6 وکٹیں لیں اور بعد میں سیریز میں 23.18 کی اوسط سے 100 ٹیسٹ وکٹیں مکمل کیں۔

یہ واپسی کا موقع انہیں ڈومیسٹک کرکٹ بالخصوص کاؤنٹی چیمپئن شپ میں برسوں کی محنت کے بعد ملا۔

محمد عباس اب تک پاکستان میں 37، انگلینڈ میں 13، یو اے ای میں 2 جب کہ ویسٹ انڈیز ، آئرلینڈ، بنگلہ دیش اور جنوبی افریقہ میں ایک ایک مرتبہ فرسٹ کلاس میچ میں اننگز میں 5 یا زیادہ وکٹیں لے چکے ہیں۔

محمد عباس پاکستان کی جانب سے فرسٹ کلاس کرکٹ میں زیادہ مرتبہ میچ میں 10 وکٹیں لینے والے مشترکہ طور پر دوسرے فاسٹ باولر بھی ہیں۔

سوئنگ کے سلطان وسیم اکرم اپنے فرسٹ کلاس کیریئر میں 16 مرتبہ میچ میں 10 وکٹیں لیکر اس فہرست میں پہلے ، محمد عباس اور وقار یونس 14،14 مرتبہ یہ کارنامہ سرانجام دیکر مشترکہ طور پر دوسرے، لیجنڈری کپتان عمران خان 13 بار فرسٹ کلاس میچ میں 10 یا زیادہ وکٹیں لیکر تیسرے جب کہ اعزاز چیمہ 11 مرتبہ یہ کارنامہ سرانجام دیکر چوتھے نمبر پر ہیں۔