سپورٹس ڈیپارٹمنٹ سرگودھا کے زیرِ اہتمام“معرکہ حق، بنیان المرصوص”کے سلسلہ میں کراٹے کے مقابلوں کا انعقاد

ہفتہ 9 مئی 2026 17:19

سرگودھا (اُردو پوائنٹ اخبارتازہ ترین - اے پی پی۔ 09 مئی2026ء) ڈسٹرکٹ سپورٹس ڈیپارٹمنٹ سرگودھا کے زیرِ اہتمام ’’معرکہ حق، بنیان المرصوص ‘‘کے سلسلہ میں سپورٹس جمنیزیم میں کراٹے کے مقابلوں کا انعقاد کیا گیا، جس میں ضلع بھرکی مختلف کراٹے اکیڈمیوں کے کھلاڑیوں نے بھرپور شرکت کی۔ نوجوان کھلاڑیوں نے شاندار کھیل، نظم و ضبط اور دفاعی مہارتوں کا عملی مظاہرہ کرتے ہوئے حاضرین سےخوب دادوصول کی۔

تقریب میں ڈسٹرکٹ سپورٹس آفیسر سرگودھا صائمہ منظور، اسسٹنٹ ڈائریکٹر سپورٹس یونیورسٹی آف سرگودھا شازیہ، جنرل سیکرٹری کراٹے ایسوسی ایشن محمد نعیم خان اور افشاں محمد دین سمیت دیگر شخصیات نے شرکت کی۔ جنہوں نے نمایاں کارکردگی کا مظاہرہ کرنے والے کھلاڑیوں میں انعامات اور اسناد تقسیم کیں۔

(جاری ہے)

اس موقع پر ڈسٹرکٹ سپورٹس آفیسر سرگودھا صائمہ منظور نے خطاب کرتے ہوئے کہا کہ ’’معرکہ حق اور بنیان المرصوص ‘‘ جیسے قومی جذبے سے جڑے پروگراموں کا مقصد نوجوان نسل میں حب الوطنی اور قومی یکجہتی کے احساس کو فروغ دینا ہے۔

کھیل صرف جسمانی سرگرمی نہیں بلکہ کردار سازی، اعتماد اور وطن سے محبت پیدا کرنے کا مؤثر ذریعہ ہیں۔ پاک فوج ہماری سلامتی، خودمختاری اور قومی وقار کی علامت ہے اور ہمیں اپنے نوجوانوں میں یہ شعور بیدار کرنا ہوگا کہ وہ کھیلوں کے میدان میں کامیابی کے ساتھ ساتھ ملک و قوم کے مفادات کے تحفظ کے لیے بھی ہمیشہ مثبت کردار ادا کریں۔