اقوام متحدہ کی غزہ میں سعودی عرب کے جاری فلاحی منصوبوں کی ستائش

اقوام متحدہ کے وفد کا غزہ میں شاہ سلمان ریلیف سینٹر کی خدمات کا بھی اعتراف

پیر 11 مئی 2026 11:45

نیویارک(اُردو پوائنٹ اخبارتازہ ترین - این این آئی۔ 11 مئی2026ء) اقوام متحدہ کے دفتر برائے انسانی امور(اوچا)کے ایک وفد نے غزہ میں شاہ سلمان ریلیف اینڈ ہیومینیٹیرین ایڈ سینٹر کی جانب سے نافذ کیے جانے والے انسانی ہمدردی کے منصوبوں کی بھرپور تعریف کی ہے۔اوچا کے دفتر نے مرکز کی جانب سے فراہم کی جانے والی میدانی امداد کے حجم اور تنوع کو سراہا اور مقامی آبادی کی مشکلات کم کرنے اور ضرورت مند طبقات کی مدد میں اس کے کلیدی کردار کی تعریف کی۔

وفد نے غزہ میں بڑھتے ہوئے انسانی چیلنجز کے باوجود امدادی منصوبوں کی تنظیم اور ان پر فوری عمل درآمد کی صلاحیت کو بھی سراہا۔یہ تعریفی کلمات اوچا کے وفد کے غزہ کے میدانی دورے کے دوران سامنے آئے، جہاں انہوں نے شاہ سلمان ریلیف سینٹر کی امدادی سرگرمیوں اور فلسطینی عوام کی مدد کے لیے وضع کیے گئے طریقہ کار کا معائنہ کیا۔

(جاری ہے)

وفد نے اپنے دورے کا آغاز شاہ سلمان ریلیف سینٹر کے مرکزی کچن کے دورے سے کیا، جو بے گھر ہونے والے خاندانوں کے لیے روزانہ کی بنیاد پر گرم کھانا فراہم کرتا ہے۔

یہ کچن روزانہ تقریبا 25 ہزار کھانے تیار کرتا ہے اور ایک مسلسل آپریٹنگ سسٹم کے تحت کام کر رہا ہے جس کا مقصد غذائی تحفظ کو یقینی بنانا اور متاثرہ خاندانوں کے معاشی بوجھ کو کم کرنا ہے۔وفد نے کچن میں کام کی رفتار، کھانا تیار کرنے کے مراحل اور اس کی نقل و حمل اور تقسیم کے طریقہ کار کا جائزہ لیا۔ اس کے علاوہ انہوں نے غزہ میں شاہ سلمان ریلیف سینٹر کے ایگزیکٹو پارٹنر سعودی سینٹر فار کلچر اینڈ ہیریٹیج کی میدانی ٹیموں کی کوششوں کو بھی دیکھا۔

دورے کے دوران وفد نے فوڈ باسکٹ کی تقسیم کے مراکز کا بھی دورہ کیا، جہاں انہوں نے ضرورت مند خاندانوں میں امدادی سامان کی تقسیم کے عمل کا مشاہدہ کیا یہ سرگرمیاں اس امدادی پروگرام کا حصہ ہیں جس کا مقصد مستفید ہونے والوں کا دائرہ کار وسیع کرنا اور غزہ کی تمام گورنریوں تک پہنچنا ہے۔وفد نے سعودی امداد کے مرکزی گودام کا بھی دورہ کیا اور وہاں امدادی قافلوں کی وصولی، سپلائی مینجمنٹ اور تقسیم کے منصوبوں کا جائزہ لیا، تاکہ غزہ کے مختلف علاقوں میں امداد کی فوری اور مسلسل ترسیل کو یقینی بنایا جا سکے۔