عالمی جنگلاتی اہداف کے حصول کی رفتار ناکافی، اقوام متحدہ کی رپورٹ

منگل 12 مئی 2026 09:25

اقوام متحدہ (اُردو پوائنٹ اخبارتازہ ترین - اے پی پی۔ 12 مئی2026ء) اقوام متحدہ کی ایک نئی رپورٹ میں خبردار کیا گیا ہے کہ دنیا 2030 تک مقرر کردہ عالمی جنگلاتی اہداف حاصل کرنے کی جانب مطلوبہ رفتار سے پیش رفت نہیں کر رہی۔شنہوا کے مطابق جاری کردہ "گلوبل فاریسٹ گولز رپورٹ 2026" کے مطابق 26 اہداف میں سے صرف 7 اہداف بڑے پیمانے پر حاصل کیے جا سکے ہیں، جبکہ 17 اہداف جزوی طور پر درست سمت میں ہیں اور 2 اہداف مکمل طور پر ہدف سے پیچھے ہیں۔

رپورٹ 48 ممالک کی رضاکارانہ قومی رپورٹس اور عالمی سطح پر دستیاب تازہ ترین اعداد و شمار پر مبنی ہے۔ یہ ممالک دنیا کے 51 فیصد جنگلاتی رقبے کی نمائندگی کرتے ہیں۔اقوام متحدہ کے مطابق 2015 سے 2025 کے درمیان دنیا بھر میں جنگلات کا رقبہ 4 کروڑ ہیکٹر سے زائد کم ہوا۔

(جاری ہے)

رپورٹ میں پائیدار جنگلاتی انتظام کے لیے مالی وسائل کی شدید کمی کی بھی نشاندہی کی گئی ہے۔

رپورٹ کے مطابق متعدد ممالک نے جنگلات کے تحفظ کے لیے پالیسی اصلاحات متعارف کرائی ہیں، جنگلات کی بحالی کے پروگراموں میں توسیع کی ہے، انتظامی نظام مضبوط بنایا ہے اور بین الاقوامی تعاون میں اضافہ کیا ہے۔تاہم مختلف خطوں میں پیش رفت یکساں نہیں رہی۔ رپورٹ میں محفوظ جنگلاتی علاقوں، طویل المدتی منصوبہ بندی اور نگرانی کے نظام میں بہتری کا ذکر کیا گیا، مگر ساتھ ہی خبردار کیا گیا کہ جنگلات کی کٹائی، موسمیاتی تبدیلی، جنگلاتی آگ، کیڑے مکوڑے اور غیر قانونی سرگرمیاں اب بھی عالمی جنگلات کے لیے بڑے خطرات ہیں۔

اقوام متحدہ نے جنگلاتی اہداف کے حصول میں تیزی لانے کے لیے جنگلات کی کٹائی روکنے، تباہ شدہ زمینوں کی بحالی، محفوظ جنگلاتی علاقوں میں اضافہ، بہتر حکمرانی، مالی وسائل کی فراہمی اور جدید مالیاتی نظام متعارف کرانے پر زور دیا ہے۔