جینک سنر نے نوویک جوکووچ کا عالمی ریکارڈ توڑ دیا،اٹالین اوپن ٹینس مینز سنگلز سیمی فائنل میں داخل

جمعہ 15 مئی 2026 12:10

روم (اُردو پوائنٹ اخبارتازہ ترین - اے پی پی۔ 15 مئی2026ء) اٹلی کے شہرہ آفاق ٹینس سٹار اور عالمی نمبر ون جینک سنر نے اے ٹی پی ماسٹرز 1000 ٹورنامنٹس میں مسلسل 32 فتوحات حاصل کر کے نوویک جوکووچ کا تاریخی ریکارڈ توڑ دیا ہے۔ ای ایس پی این کے مطابق 24 سالہ اطالوی ٹینس سٹار جینک سنر نے یہ سنگ میل اٹالین اوپن ٹینس مینز سنگلز مقابلوں کے کوارٹر فائنل میچ میں روس کے آندرے روبلوف کوسٹریٹ سیٹس میں شکست دے کرنہ صرف عبور کیا بلکہ سیمی فائنل کے لئے بھی کوالیفائی کیا۔

سیمی فائنل میں جینک سنر کا مقابلہ روسی حریف کھلاڑی ڈینیئل مدویدیف سے ہوگا۔ اٹالین اوپن ٹینس ٹورنامنٹ کے کانٹے دار مقابلوں کا سلسلہ اٹلی میں جاری ہے جس میں شائقین ٹینس کو انتہائی دلچسپ اور کانٹے دار مقابلے دیکھنے کو مل رہے ہیں۔

(جاری ہے)

مردوں کے سنگلز مقابلوں کے کوارٹر فائنل رائونڈ کے میچ میں 24 سالہ اٹلی کے شہرہ آفاق ٹینس سٹار اور عالمی نمبر ون جینک سنر نے انتہائی شاندار کارکردگی کا مظاہرہ کرتے ہوئے روسی حریف کھلاڑی آندرے روبلوف کو سٹریٹ سیٹس میں 2-6 اور 4-6 سے شکست دے کر ٹاپ فور رائونڈکے لئے کوالیفائی کرلیا۔

24 سالہ جینک سنر اب دنیائے ٹینس کے دوسرے کھلاڑی بننے کے قریب ہیں جنہوں نے تمام نو ماسٹرز 1000 ٹائٹلز اپنے نام کیے ہوں، اس سے قبل یہ اعزاز صرف سربیا کے شہرہ آفاق ٹینس سٹار نوویک جوکووچ کے پاس تھا۔جینک سنر گزشتہ 47 میچز میں سے 45 جیت چکے ہیں، جبکہ رواں سال انڈین ویلز، میامی، مونٹی کارلو اور میڈرڈ ماسٹرز ٹائٹلز بھی اپنے نام کر چکے ہیں۔

اس فتح کے بعد جینک سنر نے رواں سیزن کے پہلے پانچوں ماسٹرز ٹورنامنٹس کے سیمی فائنل میں پہنچ کر رافیل نڈال کا ریکارڈ بھی برابر کر دیا ہے۔ اپنی جیت کے بعد جذباتی انداز میں گفتگو کرتے ہوئے جینک سنر نے کہا کہ وہ ریکارڈز کے بجائے اپنی تاریخ بنانے کے لیے کھیلتے ہیں، تاہم ہوم گراؤنڈ پر یہ کامیابی ان کے لیے بہت معنی رکھتی ہے۔ اگر جینک سنر یہ ٹورنامنٹ جیتنے میں کامیاب ہو جاتے ہیں تو وہ 50 سال بعد روم میں ٹائٹل جیتنے والے پہلے اطالوی کھلاڑی بن جائیں گے۔کوارٹر فائنل رائونڈ کے ایک اور میچ میں روس کے ہی ڈینیئل مدویدیف نے سخت مقابلے کے بعد ہسپانوی ٹینس کھلاڑی مارٹن لینڈالس کو 6-1، 4-6 اور 5-7سے ہرا کر سیمی فائنل تک رسائی حاصل کی۔