منی پور،38سے زائد کوکی اور ناگا برادریوں کے لوگ یرغمال

کوکی اور ناگا برادریوں کے کئی لوگوں نے مبینہ اغوا کے خلاف احتجاج کے لیے دھرنابھی دیا

جمعہ 15 مئی 2026 14:10

امپھال (اُردو پوائنٹ اخبارتازہ ترین - این این آئی۔ 15 مئی2026ء) شورش زدہ بھارتی ریاست منی پور کے وزیر داخلہ گوونداس کونتھوجام نے کہا ہے کہ ناگا اور کوکی برادریوں سے تعلق رکھنے والے 38سے زائدافراد کو ریاست میں مختلف گروہوں نے یرغمال بنایا ہوا ہے۔کشمیر میڈیا سروس کے مطابق بدھ کے روز منی پور میں تازہ تشدد کے واقعات میں مشتبہ عسکریت پسندوں نے ضلع کانگ پوکپی میں گرجا گھر کے تین پادریوں کو گولی مار کر ہلاک اور چار افراد کو زخمی کر دیا، ضلع نونی میں ایک شہری کو گولی مار کر ہلاک اور اسکی بیوی کو زخمی کر دیا۔

جمعرات کو، کونتھوجام نے کہاکہ دونوں برادریوں کے 38سے زائدافراد کو مختلف گروپوں نے اغوا کر لیا ہے۔جن کی بازیابی کو یقینی بنانے کے لیے سول سوسائٹی کے گروپوں اور سیاسی رہنمائوں کے ساتھ بات چیت جاری ہے ۔

(جاری ہے)

کونتھوجم نے ان خیالات کا اظہار ضلع نونی میں جوزنگٹیک کے قریب حملے میں ہلاک ہونے والے شہری کے اہل خانہ سے ملاقات کے دوران کیا۔ بدھ کو، تافو کوکی گائوں کے چیئرمین ایل چونگلوئی نے سینا پتی پولیس اسٹیشن میں ایک تحریری شکایت درج کرائی تھی، جس میں دعویٰ کیا گیا تھا کہ سات ٹرکوں اور ایک کار میں سفر کرنے والے 23دیہاتیوں کو نامعلوم افراد نے حراست میں لے لیا ہے۔کوکی اور ناگا برادریوں کے کئی لوگوں نے مبینہ اغوا کے خلاف احتجاج کے لیے دھرنابھی دیا۔