مہاجرین نمائندہ فورم کا مظفرآباد میں حمزہ برہان کی ٹارگٹ کلنگ پر گہرے دکھ، افسوس اور شدید تشویش کا اظہار

مظفرآباد میں اس نوعیت کے افسوسناک واقعات امن و امان کو سبوتاژ کرنے اور گھناونی سازش ہیں، محمد شبیر کشمیر ی

جمعہ 22 مئی 2026 14:20

مظفرآباد(اُردو پوائنٹ اخبارتازہ ترین - این این آئی۔ 22 مئی2026ء) مہاجرین نمائندہ فورم کا مظفرآباد میں حمزہ برہان کی ٹارگٹ کلنگ پر گہرے دکھ، افسوس اور شدید تشویش کا اظہار، اعلی سطح تحقیقات کا مطالبہ ترجمان فورم محمد شبیر کشمیری کی جانب سے میڈیا کو جاری بیان میں کہا گیا ہے کہ دارالحکومت مظفرآباد میں اس نوعیت کے افسوسناک واقعات امن و امان کو سبوتاژ کرنے اور عوام میں خوف و ہراس پھیلانے کی ایک منظم اور گھناونی سازش ہیں۔

ترجمان نے کہا کہ حمزہ برہان کو دن دہاڑے گولیاں مار کر قتل کرنا نہ صرف ایک افسوسناک سانحہ ہے بلکہ یہ ریاست کے پرامن ماحول کو خراب کرنے کی مذموم کوشش بھی ہے۔ بھارتی بے بنیاد پراپگنڈا کو ہم مسترد کرتے ہیں اور اس کی شدید الفاظ میں مذمت کرتے ہیں۔

(جاری ہے)

مہاجرین نمائندہ فورم نے وزیر اعظم آزاد کشمیر جناب فیصل ممتاز راٹھور کے واقعہ سے متعلق بیان کا خیر مقدم کرتے ہوئے مطالبہ کیا کہ حکومت، انتظامیہ اور قانون نافذ کرنے والے ادارے اس اندوہناک واقعہ کی فوری اور شفاف تحقیقات یقینی بنائیں اور ملوث عناصر کو قانون کے کٹہرے میں لا کر قرار واقعی سزا دی جائے۔

آزاد کشمیر کے امن، استحکام اور تحریک آزادی کشمیر کو نقصان پہنچانے کے لیے دشمن قوتیں مختلف اوچھے ہتھکنڈے استعمال کر رہی ہیں، اس طرح کی بزدلانہ کارروائیاں تحریک آزادی کشمیر کے عزم کو کمزور نہیں کر سکتیں۔ترجمان نے حکومت آزاد کشمیر سے مطالبہ کیا کہ شہریوں کے جان و مال کے تحفظ اور امن و امان کی صورتحال کو مزید مؤثر بنانے کے لیے سیکیورٹی انتظامات کو مضبوط کیا جائے۔