ایم سی سی ٹانگسین ریسورسز لیمیٹڈ معدنی وسائل، تانبے اور سونے میں بہت اہمیت کا حامل ہے گورنر بلوچستان جعفرخان مندوخیل

کوئٹہ (اُردو پوائنٹ اخبارتازہ ترین - اے پی پی۔ 22 مئی2026ء) گورنر بلوچستان جعفرخان مندوخیل نے کہا ہے کہ ایم سی سی ٹانگسین ریسورسز لیمیٹڈ معدنی وسائل خاص طور پر تانبے اور سونے کی کان کنی میں بہت اہمیت کی حامل ہے، ہمیں سیندک کاپر گولڈ پروجیکٹ پر فخر ہے جو پاکستان اور چین تعاون جاری ہے، یہ منصوبہ قومی آمدنی میں اہم کردار ادا کرتا ہے اور ملازمتوں، بنیادی ڈھانچے اور مقامی سرمایہ کاری کے ذریعے بلوچستان میں ترقی کے عمل کو آگے بڑھاتا ہے۔

ان خیالات کا اظہار انہوں نے چین کے دارالحکومت بیجنگ میں ایم سی سی ٹانگسین ریسورسز لیمیٹڈ کے دورے کے موقع پر کیا۔ انہوں نے کہا کہ یہ شراکت داری دراصل ایک اقتصادی منصوبے کے ساتھ پاکستان اور چین کے درمیان خوشحالی کا پل بھی ہے۔

(جاری ہے)

وفاقی حکومت کے تعاون سے ہم اس تعاون کو مضبوط کرنے کیلئے پرعزم ہیں۔ مذکورہ منصوبے کا مقصد اس بات کو یقینی بنانا ہے کہ ان وسائل سے موجودہ اور آنے والی نسلوں کو فائدہ پہنچے۔

جمعیت علمائے اسلام کے سینیٹر کامران مرتضیٰ، سابق وزیر اعلیٰ بلوچستان ڈاکٹر عبدالمالک بلوچ، جمعیت علمائے اسلام کے عطاء الحق اور سید محمود شاہ بھی گورنر بلوچستان جعفرخان مندوخیل کے ہمراہ تھے جبکہ ایم سی سی ٹانگسین ریسورسز لیمیٹڈ کی جانب سے چیئرمین جی چنگ وانگ ، جنرل سیکرٹری ہونگیانگ ژانگ ، آفس ڈائریکٹر ہوئی وانگ اور ڈپٹی ڈائریک جئی چن موجود تھے۔

اس موقع پر گورنر بلوچستان جعفرخان مندوخیل نے کہا کہ پاکستان کا معاشی مستقبل بلوچستان کے مستقبل سے وابستہ ہے اور چین ۔پاکستان اقتصادی راہداری کے تحت چین کے ساتھ ہماری شراکت داری سے گہرا تعلق ہے۔ بلوچستان میں سٹریٹجک مقام، وسیع معدنی دولت اور بلیو اکانومی میں نمایاں صلاحیت موجود ہے،ہمارے قدرتی وسائل خطے کے معاشی منظرنامے کو بدل سکتے ہیں اور لاکھوں لوگوں کیلئے روزگار کے مواقع پیدا کر سکتے ہیں۔

انہوں نے کہا کہ ہم بلوچستان میں خاص طور پر معدنیات کی ترقی، پروسیسنگ اور متعلقہ انفراسٹرکچر میں زیادہ چینی سرمایہ کاروں کو دعوت دیتے ہیں، بلوچستان کی حکومت ایک مستحکم، محفوظ اور سرمایہ کار دوست ماحول فراہم کرنے کیلئے پرعزم ہے۔ گورنر بلوچستان نے کہا کہ اس شراکت داری کے ذریعے ہم اپنے نوجوانوں کیلئے روزگار کے مواقع ، انفراسٹرکچر کو مضبوط کریں گے اور بلوچستان کو تجارت اور صنعت کا اہم مرکز بنائیں گے ۔ انہوں نے کہا کہ میں بحیثیت گورنر بلوچستان ایم سی سی ٹانگسین ریسورسز لیمیٹڈ کی قیادت کا ان کے عزم اور تمام اسٹیک ہولڈرز کا ان کے وژن کیلئے شکریہ ادا کرتا ہوں، پاکستان اور چین ملکر مشترکہ ترقی، خوشحالی اور جدت کاری کا مستقبل تعمیر کریں گے۔