گورنربلوچستان کا چین کا دورہ مکمل، پاک چین تعاون کے فروغ پر اہم پیشرفت

منگل 26 مئی 2026 18:21

کوئٹہ (اُردو پوائنٹ اخبارتازہ ترین - اے پی پی۔ 26 مئی2026ء) گورنربلوچستان جعفرخان مندوخیل نے پاکستان بھر سے سیاسی رہنماؤں کے 16 رکنی وفد کی قیادت کرتے ہوئے چین کا سرکاری دورہ کامیابی سے مکمل کرلیا۔ دورے کے دوران وفد نے پاک چین دوستی کی گولڈن جوبلی، سرمایہ کاری، تجارت، ہائیر ایجوکیشن، یونیورسٹی اسٹوڈنٹس کے اسکالرشپ، جدید مہارتوں اور ٹیکنالوجیکل تعاون پر اعلیٰ سطحی بات چیت کی۔

گورنر مندوخیل نے کمیونسٹ پارٹی آف چائنا اور چینی حکومت کے سینئر عہدیداروں اور سرکاری حکام سے علیحدہ علیحدہ ملاقات کی اور اہم انڈسٹریل اور ٹیکنالوجیکل مراکز کے دورے کیے۔ مذکورہ وفد آج 26 مئی کی رات پاکستان واپس آئے گا۔ یہ دورہ پاکستان اور چین کے درمیان پائیدار شراکت داری کو مزید مضبوط بنانے کی جانب ایک امید افزا قدم ہے۔

(جاری ہے)

واضح رہے کہ چائنا کے ایک ہفتہ سرکاری دورے پر جانے والوں میں پاکستان پیپلز پارٹی کے سینیٹر سلیم مانڈی والا، جمعیت علمائے اسلام ف خیبرپختونخوا کے سینیٹر عطاء الحق، سابق وزیر اعلیٰ بلوچستان ڈاکٹر عبدالمالک بلوچ، جمعیت علمائے اسلام ف کے سینیٹر کامران مرتضیٰ، وزیر داخلہ بلوچستان میر ضیاء لانگو، صوبائی وزیر محمد خان لہڑی، سینیٹر سعید الحسن مندوخیل، سردارزاہ علاؤالدین لونی، پارلیمانی سیکرٹری برکت علی رند، سابق ایم این اے سید محمود شاہ، میر عزیز اللہ خان، محمد امید، جمعیت علمائے اسلام خیبرپختونخوا کے ناصر محمود اور وزیر اعلیٰ بلوچستان کے فوکل پرسن بایزید خان کاسی شامل ہیں۔