جیکب آباد میں سندھ ترقی پسند پارٹی کا اجلاس، بلدیاتی انتخابات کی تیاری تیز کرنے کا اعلان

اتوار 7 جون 2026 21:30

جیکب آباد (اُردو پوائنٹ اخبارتازہ ترین - این این آئی۔ 07 جون2026ء) جیکب آباد میں سندھ ترقی پسند پارٹی کا اجلاس، بلدیاتی انتخابات کی تیاری تیز کرنے کا اعلان۔

(جاری ہے)

تفصیلات کے مطابق سندھ ترقی پسند پارٹی ضلع جیکب آباد اور تعلقہ جیکب آباد کے عہدیداران کا ایک اہم اجلاس ایس ٹی پی ہاؤس جیکب آباد میں شکارپور ڈویژن کے صدر دلمراد خان ڈاھانی کی صدارت میں منعقد ہوا، اجلاس میں ڈویژنل جوائنٹ سیکریٹری محبوب ڈاھانی، پریس سیکریٹری عرض آدرش بنگلانی، ضلع جیکب آباد کے صدر عبدالمجید سرکی، نائب صدر نظام مستوئی، پریس سیکریٹری عبدالنبی مگسی اور خزانچی عبدالغفور تھہیم نے بطور مہمان خصوصی شرکت کی جبکہ تعلقہ جیکب آباد کے صدر محمد عمر سولنگی، نائب صدر خادم سرکی، جنرل سیکریٹری عابد حیدری، جوائنٹ سیکریٹری آصف علی، پریس سیکریٹری صاحب خان چانڈیو سمیت دیگر عہدیداران اور کارکنان بھی اجلاس میں موجود تھے ، اجلاس سے خطاب کرتے ہوئے دلمراد ڈاھانی، عرض آدرش بنگلانی، عبدالمجید سرکی اور دیگر رہنماؤں نے کہا کہ سندھ بھر سمیت شکارپور ڈویژن میں پارٹی کو مزید مضبوط، فعال اور منظم بنانے کے لیے ضلعی اور تعلقہ سطح پر دوروں اور اجلاسوں کا سلسلہ جاری رکھا جائے گا، انہوں نے کہا کہ وارڈ اور یونین کونسل کی سطح پر تنظیم سازی کو تیز کرکے پارٹی کو عوامی سطح پر مزید متحرک بنایا جائے گا، رہنماؤں کا کہنا تھا کہ سندھ ترقی پسند پارٹی کے آئین اور منشور کو سندھ کے ہر شہر، گاؤں اور بستی تک پہنچایا جائے گا اور پارٹی چیئرمین ڈاکٹر قادر مگسی کا پیغام گھر گھر پہنچانے کے لیے تمام تر توانائیاں بروئے کار لائی جائیں گی، اجلاس میں تحصیلوں اور یونین کونسلوں میں تنظیمی ڈھانچے مکمل کرکے جلد رپورٹ پیش کرنے کی ہدایت بھی کی گئی، مقررین نے کہا کہ سندھ ترقی پسند پارٹی ایک جمہوریت پسند قوم پرست جماعت ہے جس نے سندھ کے عوامی مسائل پر ہمیشہ بھرپور آواز بلند کی ہے اور سندھ دشمن سازشوں کے خلاف عملی جدوجہد کی ہے ، انہوں نے کہا کہ پارٹی کارکنان تنظیم کا قیمتی سرمایہ ہیں اور ان کے ہر دکھ سکھ میں پارٹی قیادت ان کے ساتھ کھڑی ہے ، اجلاس میں اس عزم کا اعادہ کیا گیا کہ چیئرمین ڈاکٹر قادر مگسی کی قیادت میں سندھ اور سندھی عوام کے مسائل کے حل کے لیے جدوجہد جاری رکھی جائے گی ، اجلاس کے اختتام پر اعلان کیا گیا کہ آئندہ بلدیاتی انتخابات میں جاگیردارانہ اور وڈیرا سیاست کا مقابلہ کرنے کے لیے ہر وارڈ اور یونین کونسل کی سطح پر پارٹی امیدوار میدان میں اتارے جائیں گے۔