ملک میں غیر موثر آبپاشی طریقوں کے باعث ہر سال 50ملین ایکڑ فٹ پانی ضائع ہوتا ہے،ماہرین

مکو آ نہ(اُردو پوائنٹ اخبارتازہ ترین - این این آئی۔ 11 جون2026ء) ماہرین نے خبردار کیا ہے کہ نہروں سے فصلوں تک پانی کی ترسیل کے دوران بڑے پیمانے پر ہونے والے ضیاع کو روکنا ناگزیر ہے۔ ملک میں غیر مثر آبپاشی طریقوں کے باعث ہر سال تقریبا 50 ملین ایکڑ فٹ پانی ضائع ہوتا ہے جو تقریبا پانچ تربیلا ڈیم یا سات منگلا ڈیموں کی ذخیرہ گنجائش کے برابر ہے۔ ان خیالات کا اظہار انہوں نے زرعی یونیورسٹی فیصل آباد میں فارم سطح پر موسمیاتی تبدیلی سے ہم آہنگ اور لچکدار آبی نظم و نسق کے موضوع پر منعقدہ پالیسی ڈائیلاگ کے دوران کیا۔

جس کا انعقاد ایگریکلچرل پالیسی، لا اینڈ گورننس سینٹر زرعی یونیورسٹی فیصل آباد نے آسٹریلین سینٹر فار انٹرنیشنل ایگریکلچرل ریسرچ، سی ایس آئی آر او آسٹریلیا اور پنجاب ہائر ایجوکیشن کمیشن کے تحت قائم سینٹر آف ایکسی لینس فار پبلک پالیسی اینڈ اکنامک ڈویلپمنٹ کے تعاون سے کیا۔

(جاری ہے)

ڈائریکٹر زرعی پالیسی پروفیسر ڈاکٹر ایم آصف کامران نے کہا کہ قومی سطح پر پانی کے حوالے سے بحث زیادہ تر بڑے انفراسٹرکچر منصوبوں پر مرکوز رہتی ہے، جبکہ اصل مسئلہ اور اس کا حل فارم کی سطح پر موجود ہے جہاں آبپاشی کی کارکردگی تقریبا 50 فیصد ہے۔

انہوں نے زور دیا کہ پاکستان کے آبی مسائل صرف انفراسٹرکچر کی ترقی سے حل نہیں ہو سکتے بلکہ فارم سطح پر مداخلت، موسمیاتی لحاظ سے موزوں زراعت، موثر قیمتوں کے نظام، پائیدار زیر زمین پانی کے انتظام اور شواہد پر مبنی پالیسی سازی پر توجہ دینا ہوگی۔ آسٹریلیا سی ایس آئی آر او کے ڈاکٹر مبین الدین احمد، سروسز سکین کے ڈاکٹر آصف، انجینئر مشتاق احمد گل، انجینئر کاشف منظور، ڈین کلیہ زراعت پروفیسر ڈاکٹر غلام مرتضی، ڈائریکٹر انسٹیٹیوٹ آف ایگریکلچرل ایکسٹینشن، ایجوکیشن اینڈ رورل ڈیولپمنٹ پروفیسر ڈاکٹر بابر شہباز، ڈاکٹر نعیم صدیقی، ڈاکٹر ذوالفقار احمد ثاقب اور ڈاکٹر رضا اللہ سمیت پوسٹ گریجویٹ طلبہ نے بھی شرکت کی۔

ڈاکٹر مبین الدین احمد نے زیر زمین پانی کے پائیدار استعمال کی حد مقرر کرنے، پانی کے حساب کتاب کے نظام کو بہتر بنانے اور موسمیاتی تبدیلیوں کے تناظر میں مستقبل میں دستیاب پانی کے مطابق فصلوں کے انتخاب کو ہم آہنگ کرنے کی ضرورت پر زور دیا۔ انہوں نے کہا کہ پائیدار آبی نظم و نسق کے لیے زرعی پیداوار اور ماحولیاتی تحفظ کے درمیان توازن قائم کرنا ضروری ہے۔

انہوں نے آسٹریلیا کے آبی حکمرانی کے تجربات کا ذکر کرتے ہوئے کہا کہ پاکستان سطحی اور زیر زمین پانی کے استعمال کی حد مقرر کر کے طویل المدتی پائیداری حاصل کر سکتا ہے۔ ڈاکٹر آصف نے آبپاشی سے متعلق مشاورتی خدمات، موسمیاتی معلوماتی نظام اور کمیونٹی کی شمولیت پر مبنی حکمت عملیوں کی اہمیت اجاگر کی۔ انجینئر کاشف منظور نے مٹی میں نمی ناپنے والے سینسرز اور آبپاشی شیڈولنگ ٹولز کے استعمال سے متعلق منصوبوں سے آگاہ کیا جن کے ذریعے کسان بہتر فیصلے کر کے پانی کے ضیاع کو کم کر سکتے ہیں۔

انجینئر مشتاق احمد گل نے کراپ پر ڈراپ، کیش پر ڈراپ اور جاب پر ڈراپ کے تصورات پر روشنی ڈالتے ہوئے پالیسی سازوں پر زور دیا کہ وہ صرف پانی کی پیداواری صلاحیت ہی نہیں بلکہ دیہی روزگار اور معاشی مواقع کو بھی ترجیح دیں۔ پروفیسر ڈاکٹر غلام مرتضی نے زمین کی سیم و تھور، پانی جمع ہونے اور زیر زمین پانی کے معیار میں مسلسل خرابی جیسے بڑھتے ہوئے خطرات کی نشاندہی کی۔

انہوں نے کہا کہ لاکھوں ہیکٹر زرعی اراضی ان مسائل سے متاثر ہے جس کے حل کے لیے بہتر نکاسی آب، زیر زمین پانی کے پائیدار استعمال اور کسانوں کی فعال شمولیت ضروری ہے۔ ڈائریکٹر ایکسٹینشن پروفیسر ڈاکٹر بابر شہباز نے موسمیاتی تبدیلی، آبادی میں اضافے اور پانی کی بڑھتی ہوئی طلب کے پیش نظر طویل المدتی اور پیشگی منصوبہ بندی کی ضرورت پر زور دیا۔