ایرا ن جنگ: ٹرمپ سی آئی اے کی ہر بات پر بھروسہ نہ کریں.جنرل مائیک فلن

واشنگٹن(اردوپوائنٹ اخبارتازہ ترین-انٹرنیشنل پریس ایجنسی۔12 جون ۔2026 ) ٹرمپ کے پہلے دور صدارت میں مشیر نیشنل سیکیورٹی کونسل لیفٹیننٹ جنرل (ر) مائیک فلن نے ٹرمپ کو ایران سے متعلق مشورہ دیتے ہوئے کہا کہ ٹرمپ سی آئی اے کی ہر بات پر بھروسہ نہ کریں، انہیں خارجہ پالیسی کے جال میں پھنسایا جا رہا ہے. واشنگٹن میں گفتگو کرتے ہوئے لیفٹیننٹ جنرل(ر) مائیک فلن نے کہا کہ امریکا ایک سنگین اور پیچیدہ جنگ میں داخل ہو چکا ہے انہوں نے کہا کہ ایران کے بارے میں فوجی ماہرین کی رائے کو ترجیح دی جائے.

(جاری ہے)

لیفٹیننٹ جنرل (ر) مائیک فلن ایرانی نے کہا کہ مذاکرات کاروں کی باتوں پر بھی اندھا اعتماد نہ کیا جائے جنرل (ر) مائیک فلن نے کہا کہ امریکا کو مزید جنگ نہیں، بحران سے نکلنے کا راستہ چاہیے، امریکا کی عالمی ساکھ برقرار رکھتے ہوئے بحران ختم کیا جائے واضح رہے کہ جنرل مائیک فلن پر سفید فام انتہا پسندی‘اسرائیلی بالادستی کے حامی ہونے اور جنوری2020میںانتخابی نتائج کے خلاف واشنگٹن میں جمع ہونے والے ٹرمپ کے حامیوں کو امریکی کانگریس کی عمارت”کیپٹل ہل“پر حملے کے لیے اکسانے کے الزامات ہیں.

جنرل فلن کے بارے میں کہا جاتا ہے کہ نسل پرست ہیں اور مذہبی عقائد کے حوالے سے وہ اسرائیل کی بالادستی پر یقین رکھتے ہیں جنوری2020کے واقعات پر بنائی جانی والی کئی دستاویزی فلموں اور رپورٹس میں ان کا نام نمایاں طورپر سامنے آتا رہا ہے اور اس کے علاوہ ان کی مظاہرین سے خطاب کی ایسی ویڈیوزبھی سامنے آچکی ہیں جن میں وہ نمایاں الفاظ میں انہیں ”بائبل“کے حوالے دے کر اکساتے دکھائے دیتے ہیں وہ اس پر یقین رکھتے ہیں کہ امریکا اور سفید فام اکثریت رکھنے والے ملکوں میں دیگر اقوام کی نقل مکانی کی وجہ سے سفید فام نسل کو اپنی بقاءکے حوالے خطرات لاحق ہیں.

امریکی ذرائع ابلاغ کے مطابق اپنے دوسرے عہد صدارت میں صدرٹرمپ کبھی مذہبی لبادے میں نظرآتے ہیں تو کبھی وہ خود کو ایک مکمل سیکولر شخص قراردیتے ہیں ان کے پہلے عہد صدارت میں انہوں نے اسرائیل کی حمایت اور دیگر اقوام ومذاہب کے بارے میں سخت گیر نظریات رکھنے والے ”ایویجنیکل“عیسائی فرقے سے تعلق رکھنے افراد کو اپنی کابینہ میں نمایاں عہدے دیئے تھے جن میں مائیک فلن اور جان بولٹن جیسے افراد نمایاں تھے اس فرقے کوماننے والے کا موقف ہے کہ اسرائیل کی غیرمشروط حمایت وتائید ان کا مذہبی فریضہ ہے ‘موجودہ ٹرمپ انتظامیہ میں بھی درجنوں ”ماڈریٹ ایویجنیکل“عہدیدار شامل ہیں تاہم اس کے ساتھ انہوں نے بعض سیکولر یا کم شدت پسندنسل پرستوں کو” بیلنس“ کے لیے شامل کررکھا ہے.