ایف پی سی سی آئی کی آئی سی سی ڈی بورڈ اجلاس میں بھرپور شرکت، او آئی سی ممالک سے اقتصادی تعاون بڑھانے کے عزم کا اعادہ

کراچی (اُردو پوائنٹ اخبارتازہ ترین - این این آئی۔ 04 جولائی2026ء) فیڈریشن آف پاکستان چیمبرز آف کامرس اینڈ انڈسٹری (ایف پی سی سی آئی)نے ترکیہ کے دارالحکومت انقرہ میں منعقد ہونے والے اسلامک چیمبر آف کامرس اینڈ ڈیولپمنٹ (آئی سی سی ڈی)کے 40ویں بورڈ آف ڈائریکٹرز اجلاس میں بھرپور شرکت کرتے ہوئے اسلامی ممالک کے درمیان اقتصادی تعاون، تجارت اور سرمایہ کاری کے فروغ میں پاکستان کے قائدانہ کردار کا اعادہ کیا۔

ایف پی سی سی آئی کے صدر عاطف اکرام شیخ نے ہفتہ کو جاری بیان میں کہا کہ اجلاس میں اقتصادی انضمام، نجی شعبے کے کردار کے استحکام، اسٹریٹجک شراکت داریوں کے فروغ اور عالم اسلام میں تجارت، سرمایہ کاری اور پائیدار اقتصادی ترقی کے نئے مواقع پیدا کرنے کے عزم کا اعادہ کیا گیا۔

(جاری ہے)

انہوں نے بتایا کہ بورڈ آف ڈائریکٹرز نے 2026 تا 2029 کی مدت کے لیے آئی سی سی ڈی کی ایگزیکٹو کمیٹی اور فنانشل کمیٹی میں پاکستان کی نمائندگی برقرار رکھنے کی منظوری دی، جسے انہوں نے ایف پی سی سی آئی کی فعال سفارتی و اقتصادی کوششوں اور او آئی سی ممالک کے درمیان تعاون کے فروغ کا اعتراف قرار دیا۔

اجلاس میں ایف پی سی سی آئی کی نائب صدر قر اةلعین کی قیادت میں اعلی سطح پاکستانی وفد نے شرکت کی، جبکہ 19 رکن ممالک کے کاروباری رہنماں اور سینئر نمائندوں نے بھی شرکت کرتے ہوئے آئی سی سی ڈی کی اسٹریٹجک ترجیحات، تجارت، سرمایہ کاری، جدت طرازی، انٹرپرینیورشپ اور نجی شعبے کی ترقی سے متعلق اہم اقدامات کا جائزہ لیا۔قر اةلعین نے اجلاس سے خطاب کرتے ہوئے کہا کہ بورڈ نے ادارے کی گورننس اور ادارہ جاتی صلاحیت کو مزید مضبوط بنانے کے لیے جاری اصلاحاتی پروگراموں پر پیش رفت کا جائزہ لیا، جبکہ بی 57 پلس (B57+) بزنس لیڈرز نیٹ ورک کے تحت تجارت و سرمایہ کاری کے فروغ اور بزنس ٹو گورنمنٹ روابط کو مستحکم بنانے کے اقدامات کو سراہا گیا۔

انہوں نے بتایا کہ آئی سی سی ڈی کی گولڈن جوبلی تقریبات 2027 میں استنبول میں منعقد ہوں گی۔انہوں نے مزید بتایا کہ اجلاس کے موقع پر خواتین اور نوجوانوں کو بااختیار بنانے، انٹرپرینیورشپ، استعداد کار میں اضافے، پائیدار ترقی، غذائی تحفظ اور سرمایہ کاری میں سہولت کاری جیسے اہم موضوعات پر متعدد اعلی سطحی گول میز کانفرنسیں، پینل مباحثے اور اسٹریٹجک سیشنز منعقد کیے گئے۔

قر اةلعین نے "جدت طرازی اور انٹرپرینیورشپ: نوجوان اور خواتین کاروباری افراد" کے عنوان سے منعقدہ پینل میں بطور مقرر شرکت کرتے ہوئے کہا کہ چیمبرز آف کامرس نوجوانوں اور خواتین کو کاروباری مواقع فراہم کرنے، مالیاتی رسائی بہتر بنانے، سازگار کاروباری ماحول پیدا کرنے اور نئی نسل کے کاروباری رہنماں کی سرپرستی میں کلیدی کردار ادا کر سکتے ہیں۔

ایف پی سی سی آئی کے مطابق پاکستانی وفد میں انفارمیشن ٹیکنالوجی، آرٹیفیشل انٹیلی جنس، صنعتی آٹومیشن، سیاحت، تعمیرات، لاجسٹکس، ٹرانسپورٹیشن اور سیکیورٹی ٹیکنالوجیز سمیت مختلف شعبوں سے تعلق رکھنے والے ممتاز کاروباری رہنما شامل تھے، جن کی شرکت پاکستان کے ابھرتے ہوئے کاروباری شعبوں کو عالمی سطح پر متعارف کرانے اور او آئی سی رکن ممالک کے ساتھ اقتصادی تعاون کو مزید وسعت دینے کی کوششوں کا مظہر ہے۔