ایاز میمن موتی والا کے ادارے موتی والا ریئل اسٹیٹ اینڈ مارکیٹنگ کو پاک سٹی کا باضابطہ سیلز پارٹنر مقرر کر دیا گیا

کراچی (اُردو پوائنٹ اخبارتازہ ترین - این این آئی۔ 06 جولائی2026ء) پاک اسٹار گروپ آف کمپنیز نے موتی والا ریئل اسٹیٹ اینڈ مارکیٹنگ کے ساتھ مفاہمتی یادداشت (MOU) پر دستخط کردیے ہیں، جس کے تحت موتی والا ریئل اسٹیٹ اینڈ مارکیٹنگ کو پاک سٹی کا باضابطہ سیلز پارٹنر مقرر کیا گیا ہے۔ اس شراکت داری کا مقصد پاکستان بھر اور بیرونِ ملک مقیم پاکستانیوں تک پاک سٹی کے منصوبے کو مؤثر انداز میں متعارف کرانا، سرمایہ کاری کے مواقع کو فروغ دینا اور منصوبے کی مارکیٹنگ کو مزید مضبوط بنانا ہے۔

اس موقع پر چیئرمین پاک اسٹار گروپ آف کمپنیز محسن خان عباسی نے اس شراکت داری کو خوش آئند قرار دیتے ہوئے کہا کہ ایاز میمن موتی والا کی پراپرٹی سیکٹر میں جدت ، ڈیجیٹل پلیٹ فارن پیشہ ورانہ صلاحیت، وسیع مارکیٹنگ نیٹ ورک اور سرمایہ کاروں کے ساتھ مضبوط روابط پاک سٹی کی کامیابی میں اہم کردار ادا کریں گے۔

(جاری ہے)

انہوں نے کہا کہ اس اشتراک سے منصوبے کی مارکیٹنگ مزید مؤثر ہوگی، سرمایہ کاروں کا اعتماد بڑھے گا اور پاک سٹی رئیل اسٹیٹ کے شعبے میں ایک مضبوط اور قابلِ اعتماد برانڈ کے طور پر مزید نمایاں ہوگا۔

ایاز میمن موتی والا نے اپنے بیان میں کہا کہ ہماری اولین ترجیح مضبوط ڈیجیٹل مارکیٹنگ نیٹ ورک قائم کرنا، سرمایہ کاروں سے مؤثر رابطہ کاری کو فروغ دینا اور کاروباری نیٹ ورکنگ کو وسعت دینا ہے۔ انہوں نے کہا کہ رئیل اسٹیٹ کے شعبے میں جعل سازی اور غیر قانونی سرگرمیوں سے عوام کو محفوظ رکھنا، شفاف سرمایہ کاری کے فروغ کے لیے عملی اقدامات کرنا اور لوگوں کی قوتِ خرید کو مدنظر رکھتے ہوئے ایسے سرمایہ کاری کے مواقع فراہم کرنا ہماری ذمہ داری ہے جو محفوظ، منافع بخش اور ہر طبقے کی دسترس میں ہوں۔

انہوں نے مزید کہا کہ پاک اسٹار گروپ آف کمپنیز کے ساتھ یہ شراکت داری سرمایہ کاروں کے لیے نئے مواقع پیدا کرے گی، عوام کے اعتماد میں اضافہ کرے گی اور پاک سٹی کو ایک کامیاب، قابلِ اعتماد اور جدید ہاؤسنگ منصوبے کے طور پر مزید مستحکم بنانے میں اہم کردار ادا کرے گی۔تقریب اسلام آباد کے ایک مقامی ہوٹل میں منعقد ہوئی، جس میں کاروباری شخصیات، سرمایہ کاروں، بلڈرز، مارکیٹنگ پروفیشنلز اور مختلف شعبہ ہائے زندگی سے تعلق رکھنے والے افراد نے بڑی تعداد میں شرکت کی۔ شرکاء نے اس شراکت داری کو رئیل اسٹیٹ سیکٹر کے لیے ایک مثبت، خوش آئند اور دور رس نتائج کی حامل پیش رفت قرار دیا۔