ڈپٹی کمشنر شہید بینظیرآباد اور ایم پی اے غلام قادر چانڈیو کا سکرنڈ میں اسپیشل ایجوکیشن اینڈ ری ہیبلیٹیشن سینٹر کی زیر تعمیر عمارت کا دورہ

جمعرات 9 جولائی 2026 17:49

حیدرآباد (اُردو پوائنٹ اخبارتازہ ترین - اے پی پی۔ 09 جولائی2026ء) ڈپٹی کمشنر شہید بینظیرآباد عبدالصمد نظامانی اور رکن سندھ اسمبلی غلام قادر چانڈیو نے ریجنل ڈائریکٹر اسپیشل ایجوکیشن نثار احمد بروہی کے ہمراہ سکرنڈ کا دورہ کرتے ہوئے اسپیشل ایجوکیشن اینڈ ری ہیبلیٹیشن سینٹر کی زیر تعمیر عمارت، پبلک لائبریری اور پارک کا معائنہ کیا۔ اس موقع پر متعلقہ محکموں کے افسران نے جاری ترقیاتی منصوبوں پر بریفنگ دیتے ہوئے تعمیراتی کام کی رفتار، معیار اور اب تک ہونے والی پیش رفت سے آگاہ کیا۔

ڈپٹی کمشنر نے تعمیراتی کام کو مقررہ مدت میں اعلیٰ معیار کے ساتھ مکمل کرنے کی ہدایت کرتے ہوئے کہا کہ عوامی فلاح و بہبود کے منصوبوں میں کسی قسم کی غفلت یا ناقص کام ہرگز برداشت نہیں کیا جائے گا۔

(جاری ہے)

رکن سندھ اسمبلی غلام قادر چانڈیو نے کہا کہ حکومت سندھ عوام کو بہتر تعلیمی، سماجی اور تفریحی سہولیات کی فراہمی کے لیے عملی اقدامات کر رہی ہے۔

انہوں نے کہا کہ اسپیشل ایجوکیشن اینڈ ری ہیبلیٹیشن سینٹر خصوصی افراد کی تعلیم، تربیت اور بحالی میں اہم کردار ادا کرے گا، جبکہ جدید سہولیات سے آراستہ پبلک لائبریری اور پارک شہریوں، خصوصاً نوجوانوں اور بچوں کے لیے مفید ثابت ہوں گے۔ڈپٹی کمشنر عبدالصمد نظامانی نے متعلقہ افسران کو ہدایت کی کہ منصوبوں کی بروقت تکمیل کو یقینی بنایا جائے اور تعمیراتی معیار پر خصوصی توجہ دی جائے تاکہ عوام جلد از جلد ان سہولیات سے مستفید ہو سکیں۔ اس موقع پر اسسٹنٹ کمشنر سکرنڈ رمیز راجہ، پرنسپل اسپیشل ایجوکیشن سنٹر عبدالرحیم ٹانوری اور دیگر متعلقہ افسران موجود تھے۔