غیر ملکی کوچز نے پاکستان ہاکی ٹیم کی کمان سنبھال لی، ورلڈ کپ کی تیاریاں تیز

ہفتہ 11 جولائی 2026 19:05

لاہور/اسلام آباد(اُردو پوائنٹ اخبارتازہ ترین - این این آئی۔ 11 جولائی2026ء) پاکستان ہاکی ٹیم کے غیر ملکی کوچز نے پاکستان پہنچتے ہی اپنی ذمہ داریاں سنبھال لیں۔آسٹریلیا کے فٹنس کوچ ڈیوڈ ڈائر، گول کیپر کوچ باب ویلڈوف، اسپورٹس سائیکا لوجسٹ کرس بوون نے ہفتہ کے روز صبح نصیر بندہ ہاکی سٹیڈیم میں جاری پاکستان جونئیر ہاکی ٹیم کے کھلاڑیوں کو ٹریننگ دی۔

قومی ہاکی کھلاڑیوں کے تین گھنٹے جاری رہنے والے ٹریننگ سیشن میں غیر ملکی کوچز نے کھلاڑیوں کی فٹنس کا جائزہ لیا، غیر ملکی کوچز شام میں بھی پاکستان ہاکی ٹیم کے ٹریننگ سیشن میں کھلاڑیوں کی فٹنس اور کارکردگی کا جائزہ لیں گے۔دوسری جانب ورلڈ کپ کی تیاری کے لیے 26ممکنہ کھلاڑیوں کے ناموں کا بھی اعلان کردیا گیا ہے جو آج شام سے اسلام آباد میں ٹریننگ کریں گے۔

(جاری ہے)

کیمپ کے لیے طلب کئے گئے 26کھلاڑیوں میں سفیان خان اور حنان شاہد کا نام بھی شامل ہے جو انجری سے ری کوری کے بعد پاکستان ٹیم کا کیمپ جوائن کریں گے۔سفیان خان اور حنان شاہد ان دونوں کھلاڑیوں کا کہنا ہے کہ پہلا ہدف ورلڈ کپ میں ٹیم کو سیمی فائنل میں پہنچانا ہے۔پاکستان ہاکی فیڈریشن کے صدر محی الدین وانی کا کہنا ہے کہ غیر ملکی کوچز کی تعیناتیاں پاکستان ہاکی کے ایک نئے دور کا آغاز ہیں۔ ورلڈ کپ 15 اگست سے نیدر لینڈ اور بیلجیئم میں شروع ہوگا۔