ورلڈ کپ تیاری،پاکستان ہاکی فیڈریشن کے بڑے فیصلے

فٹنس پر زیرو ٹالرنس، اسکواڈ کا فیصلہ غیر ملکی کوچز کریں گے

منگل 14 جولائی 2026 17:00

ورلڈ کپ تیاری،پاکستان ہاکی فیڈریشن کے بڑے فیصلے

اسلام آباد (اُردو پوائنٹ اخبارتازہ ترین - این این آئی۔ 14 جولائی2026ء) پاکستان ہاکی فیڈریشن نے آئندہ ماہ کھیلے جانیوالے ہاکی ورلڈ کپ کی تیاریوں کے سلسلے میں بڑے فیصلے کر لئے، کھلاڑیوں کی فٹنس پر کسی بھی قسم کا سمجھوتہ نہ کرنے سمیت ورلڈ کپ اسکواڈ کے چنائو کیلئے اختیار غیر ملکی کوچز کو دیدیئے۔ذرائع کے مطابق ورلڈ کپ اسکواڈ کیلئے غیر ملکی کوچز کی زیر نگرانی قومی ہاکی ٹیم کا تربیتی کیمپ جاری ہے جو تمام کھلاڑیوں کے جامع فٹنس ٹیسٹ لے رہے ہیں۔

(جاری ہے)

ہر کھلاڑی کی انفرادی فٹنس رپورٹ بھی تیار کی جائے گی، جس کی بنیاد پر ورلڈ کپ اسکواڈ کو حتمی شکل دی جائے گی۔فیڈریشن حکام نے واضح کیا کہ صرف مکمل طور پر فٹ کھلاڑیوں کو ہی قومی ٹیم میں جگہ دی جائے گی، جبکہ کسی بھی غیر فٹ کھلاڑی کو اسکواڈ میں شامل نہیں کیا جائے گا۔ غیر ملکی کوچز روزانہ دو سیشنز میں کھلاڑیوں کی جسمانی استعداد، برداشت اور مجموعی فٹنس کا تفصیلی جائزہ لے رہے ہیں تاکہ ورلڈ کپ کے لیے بہترین اور مکمل طور پر تیار ٹیم منتخب کی جا سکے۔