چین پاک شہروں کے درمیان سسٹر سٹی مفاہمتی یادداشت پر دستخط، تعاون کو مزید فروغ دینے پر اتفاق

جمعرات 23 جولائی 2026 22:11

لاہور(اُردو پوائنٹ اخبارتازہ ترین - این این آئی۔ 23 جولائی2026ء) چین کے صوبہ ہنان کے شہر لوڈی اور پاکستان کے صوبہ پنجاب کے شہر گجرات کے درمیان سسٹر سٹی مفاہمتی یادداشت (ایم او یو) پر دستخط ہو گئے، جس سے دونوں شہروں کے درمیان ادارہ جاتی اور عملی تعاون کے ایک نئے مرحلے کا آغاز ہوا۔چائنہ اکنامک نیٹ کے مطابق اس مفاہمتی یادداشت پر لوڈی شہر کے میئر یانگ وی اور حکومتِ پنجاب کے وزیر صنعت، تجارت و سرمایہ کاری شافع حسین نے لاہور میں منعقدہ ایک تقریب کے دوران دستخط کیے۔

اس موقع پر لاہور میں چین کے قونصل جنرل سن یان بھی موجود تھے۔ یہ معاہدہ اقتصادی ترقی، تجارت، سرمایہ کاری اور ثقافتی تبادلوں کے شعبوں میں طویل المدتی تعاون کے لیے ایک جامع فریم ورک فراہم کرتا ہے، جو چین پاکستان اقتصادی راہداری (سی پیک) کے تحت دونوں ممالک کے بڑھتے ہوئے اشتراک کی عکاسی ہے۔

(جاری ہے)

توقع ہے کہ سسٹر سٹی شراکت داری کے ذریعے اہم شعبوں میں تعلیم اور تکنیکی مہارت کا تبادلہ فروغ پائے گا، خصوصاً زرعی جدیدکاری کے میدان میں، جہاں لوڈی کی زرعی مشینری کی مضبوط مینوفیکچرنگ صلاحیتیں گجرات کی صنعتی اور زرعی بنیاد کے لیے مفید ثابت ہوں گی۔

اپنے دورے کے دوران میئر یانگ وی نے لوڈی کی زرعی مشینری تیار کرنے والی پانچ معروف کمپنیوں کے سربراہان پر مشتمل ایک وفد کی قیادت کی، جس نے لاہور میں تین روزہ کاروباری مشن میں شرکت کی۔ وفد نے مختلف مقامات کا دورہ کیا اور اپنے پاکستانی ہم منصبوں کے ساتھ تفصیلی مذاکرات کیے تاکہ زرعی مشینری کے شعبے میں مشترکہ تعاون کے منصوبوں کا جائزہ لیا جا سکے۔

رپورٹ کے مطابق دوسری جانب چائنا کونسل فار دی پروموشن آف انٹرنیشنل ٹریڈ (CCPIT) کی لوڈی برانچ نے پاکستان-ہنان چیمبر آف کامرس اینڈ انڈسٹری کے ساتھ دوستی اور تعاون کے ایک معاہدے پر بھی دستخط کیے۔ اس معاہدے کے تحت دونوں فریق اقتصادی ترقی، سائنس و ٹیکنالوجی، ثقافتی روابط، سرمایہ کاری کے فروغ اور وفود کے تبادلوں کے شعبوں میں تعاون کو وسعت دیں گے، جس سے کاروباری اداروں کے درمیان روابط مزید مضبوط ہوں گے اور دوطرفہ تجارتی نظام کو مزید مستحکم بنانے میں مدد ملے گی۔